యాదగిరిగుట్ట, యాదగిరిగుట్టలో నూతనంగా నిర్మించనున్న ప్రభుత్వ వైద్య కళాశాల కోసం కేటాయించిన స్థలాన్ని జిల్లా కలెక్టర్ అనురాగ్ జయంతి బుధవారం పరిశీలించారు.

ఈ సందర్భంగా నిర్మాణానికి కేటాయించిన స్థలాన్ని సందర్శించి అక్కడ చేపట్టాల్సిన పనుల పురోగతిపై సంబంధిత అధికారులను అడిగి తెలుసుకున్నారు. వైద్య కళాశాల నిర్మాణ పనులు ఎప్పటి నుంచి ప్రారంభించారో, ప్రస్తుతం చేపడుతున్న ఏర్పాట్ల గురించి అధికారులు కలెక్టర్‌కు వివరించారు.

అనంతరం వైద్య కళాశాల భవనానికి సంబంధించిన నమూనా మ్యాప్‌ను పరిశీలించిన కలెక్టర్, విద్యార్థులు మరియు వైద్య సిబ్బందికి అవసరమైన అన్ని సౌకర్యాలు ఉండేలా నిర్మాణ పనులు చేపట్టాలని సూచించారు.

వైద్య కళాశాల నిర్మాణాన్ని ఆలస్యం చేయకుండా వేగవంతంగా పూర్తి చేయాలని అధికారులను ఆదేశించారు. వైద్య కళాశాల నిర్మాణం పూర్తయితే జిల్లాలో వైద్య విద్యకు మరింత ప్రోత్సాహం లభించడమే కాకుండా ప్రజలకు మెరుగైన వైద్య సేవలు అందుబాటులోకి వస్తాయని తెలిపారు.

ఈ కార్యక్రమంలో మెడికల్ అధికారులు, ఇంజినీరింగ్ విభాగం డీఈ, తహశీల్దార్ తదితరులు పాల్గొన్నారు.