వినాయక చవితి పండుగను భక్తిశ్రద్ధలతో, ప్రశాంత వాతావరణంలో నిర్వహించేందుకు అన్ని శాఖల అధికారులు సమన్వయంతో పనిచేయాలని నారాయణఖేడ్ సబ్‌ కలెక్టర్ ఎన్. ఉమా హారతి సూచించారు. గురువారం నారాయణఖేడ్ సబ్‌ కలెక్టర్ కార్యాలయంలో ఆమె ఆధ్వర్యంలో పోలీస్, రెవెన్యూ, మున్సిపల్, పంచాయతీరాజ్, అగ్నిమాపక శాఖలతో పాటు ఇతర శాఖల అధికారులతో సన్నాహక సమావేశం నిర్వహించారు. ఈ సందర్భంగా వినాయక విగ్రహాల ఏర్పాటు, భక్తులకు అవసరమైన సౌకర్యాలు, ట్రాఫిక్ నియంత్రణ, భద్రతా చర్యలు, పారిశుద్ధ్యం, తాగునీరు, విద్యుత్‌ సరఫరా, అగ్నిప్రమాదాల నివారణ, నిమజ్జన కార్యక్రమం వంటి అంశాలపై అధికారులు చర్చించారు. పండుగ సందర్భంగా ప్రజలకు ఎలాంటి ఇబ్బందులు కలగకుండా ముందస్తు చర్యలు చేపట్టాలని, నిమజ్జన కార్యక్రమాన్ని కూడా ఎలాంటి అవాంఛనీయ సంఘటనలు చోటుచేసుకోకుండా సజావుగా నిర్వహించేలా అన్ని శాఖలు సమన్వయంతో పనిచేయాలని సబ్‌ కలెక్టర్ అధికారులకు సూచించారు. సమావేశంలో డీఎస్పీ వెంకటరెడ్డి, డిప్యూటీ కలెక్టర్లు ప్రతిభ శేఖర్, లక్ష్మీ దీపికతో పాటు వివిధ శాఖల అధికారులు పాల్గొన్నారు.