సంగారెడ్డి పట్టణంలో వినాయక చవితి నవరాత్రి ఉత్సవాలు ఘనంగా ప్రారంభమయ్యాయి. టీపీసీసీ వర్కింగ్ ప్రెసిడెంట్ జగ్గారెడ్డి ఆధ్వర్యంలో పట్టణంలోని పలు ప్రాంతాల్లో ఏర్పాటు చేసిన వినాయక మండపాల్లో తొలి రోజు పూజా కార్యక్రమాలు భక్తిశ్రద్ధలతో నిర్వహించారు. రామ్‌నగర్‌లోని రామ్ మందిర్ వద్ద జగ్గారెడ్డి భక్తులతో కలిసి భజన చేస్తూ ఊరేగింపులో పాల్గొని, బ్రాహ్మణవాడ నుంచి మట్టి గణపతి విగ్రహాన్ని తీసుకువచ్చి మండపంలో ప్రతిష్ఠించారు. అనంతరం వివేకానంద యూత్ అసోసియేషన్, చైతన్య యువజన సంఘం, ఐబీ యూత్ కాంగ్రెస్, భరత్ సాయి రెడ్డి యువసేన ఆధ్వర్యంలో ఏర్పాటు చేసిన వినాయక మండపాల్లో నిర్వహించిన ప్రత్యేక పూజల్లో జగ్గారెడ్డి కుటుంబ సభ్యులు పాల్గొన్నారు. కార్యక్రమాల్లో జయారెడ్డి, గుణ చైతన్య రెడ్డి దంపతులు, భరత్ సాయి రెడ్డి, కాబోయే వధువు పాలక్ పటేల్, నిర్మలా జగ్గారెడ్డి తదితరులు పాల్గొన్నారు. ఈ సందర్భంగా జగ్గారెడ్డి సంగారెడ్డి ప్రజలతో పాటు తెలంగాణ, ఆంధ్రప్రదేశ్ రాష్ట్రాల ప్రజలకు వినాయక చవితి శుభాకాంక్షలు తెలిపారు. విఘ్నేశ్వరుడి ఆశీస్సులతో ప్రజలందరూ సుఖసంతోషాలతో, ఆయురారోగ్యాలతో జీవించాలని ఆకాంక్షించారు.