మనూర్: ప్రభుత్వ జూనియర్ కళాశాలకు సొంత భవనం నిర్మించి, విద్యార్థులకు సరిపడా తరగతి గదులు, ప్రయోగశాలలు, ఇతర మౌలిక సదుపాయాలు కల్పించాలని ఎస్‌ఎఫ్‌ఐ నారాయణఖేడ్ డివిజన్ కార్యదర్శి స్వరాజ్ డిమాండ్ చేశారు. మంగళవారం ట్రైనీ డిప్యూటీ కలెక్టర్ ప్రతిభ శేఖర్‌కు ఎస్‌ఎఫ్‌ఐ నాయకులు వినతిపత్రం అందజేశారు. ప్రస్తుతం కళాశాలలో గదులు సరిపోకపోవడంతో విద్యార్థులు ఇబ్బందులు పడుతున్నారని, కొన్ని సందర్భాల్లో వరండాల్లో కూర్చొని తరగతులు వినాల్సి వస్తోందని తెలిపారు. ల్యాబ్‌లకు ప్రత్యేక గదులు లేక విద్యార్థుల చదువుకు ఆటంకం కలుగుతోందన్నారు. ప్రభుత్వం వెంటనే స్పందించి కళాశాలకు సొంత భవనం నిర్మించడంతో పాటు అవసరమైన అన్ని మౌలిక సదుపాయాలు కల్పించాలని ఎస్‌ఎఫ్‌ఐ నాయకులు కోరారు.