తెలంగాణ గురుకుల సెట్–2026లో భాగంగా 5వ తరగతి ప్రవేశ పరీక్షలో మండల పరిషత్ ప్రాథమిక పాఠశాల వెల్లంకి విద్యార్థులు అద్భుత ఫలితాలు సాధించారు. పరీక్షకు హాజరైన 10 మంది విద్యార్థులు తొలి విడతలోనే 10కి 10 మంది వివిధ గురుకుల పాఠశాలల్లో సీట్లు దక్కించుకున్నారు.

ఈ సందర్భంగా గ్రామ సర్పంచ్ ఇడెం రాధ శ్రీనివాస్, అమ్మ ఆదర్శ పాఠశాల కమిటీ చైర్పర్సన్ పులగం సులోచన విద్యార్థులను అభినందించారు. గత సంవత్సరం నుంచి 4వ తరగతి విద్యార్థులకు గురుకుల ప్రవేశ పరీక్షకు ఉచిత స్టడీ మెటీరియల్ అందిస్తున్న విపంచి ఫౌండేషన్ చైర్మన్ అనుముల శ్రీనివాస్, ప్రోగ్రాం కో-ఆర్డినేటర్ నకిరేకంటి సతీష్‌లను ప్రశంసించారు.

విద్యార్థుల విజయానికి కృషి చేసిన ఉపాధ్యాయులు ఇట్టే సోమిరెడ్డి, ఉయ్యాల బిక్షమయ్య, దూదిగామ సువర్ణ, మందుగుల వెంకటయ్య, కొసనం మాధవి, విద్యా వాలంటీర్లు నకిరేకంటి అశ్విని, వనం రాజేశ్వరి లను పాఠశాల ప్రధానోపాధ్యాయులు పల్లె మోహన్ రెడ్డి అభినందించారు.