సూర్యాపేట, ఆగస్టు 31: సమాజ సేవ పట్ల బాధ్యత, సేవా భావాన్ని చాటుతూ సూర్యాపేట దురాజ్‌పల్లి సమీపంలోని శ్రీ స్వామినారాయణ గురుకుల్ ఇంటర్నేషనల్ స్కూల్ విద్యార్థులు సేవా కార్యక్రమంలో పాల్గొన్నారు. ఉండ్రుగొండ సమీపంలోని పాఠశాలకు చెందిన విద్యార్థులు సోమవారం సూర్యాపేటలోని చార్లెట్ పిల్లల అనాథాశ్రమాన్ని సందర్శించి అక్కడి చిన్నారులతో కొంత సమయం గడిపారు.

ఈ సందర్భంగా అనాథాశ్రమంలోని చిన్నారులకు నోట్‌బుక్స్, పెన్నులు, పెన్సిళ్లు తదితర విద్యా సామగ్రిని అందజేశారు. విద్యార్థులు చిన్నారులతో ఆప్యాయంగా మమేకమై వారితో మాట్లాడారు. వారి చదువు, భవిష్యత్తు గురించి తెలుసుకుంటూ ప్రోత్సాహాన్ని అందించారు. చిన్నారులతో కలిసి సమయం గడిపి వారిలో ఆనందాన్ని నింపారు.

విద్యార్థుల్లో చిన్ననాటి నుంచే సేవా భావం, సామాజిక బాధ్యత, మానవీయ విలువలను పెంపొందించేందుకు ఇటువంటి కార్యక్రమాలు దోహదపడతాయని పాఠశాల వర్గాలు పేర్కొన్నాయి. ‘సేవే పరమో ధర్మః’ అనే సందేశాన్ని ఆచరణలో చూపించేలా విద్యార్థులు చేపట్టిన ఈ కార్యక్రమం అభినందనీయం అని తెలిపారు.

ఈ సందర్భంగా పాఠశాల ప్రిన్సిపల్ సీహెచ్. శ్రీనివాస్ ఆనంద్ మాట్లాడుతూ అనాథ చిన్నారులతో సమయం గడపడం ద్వారా విద్యార్థుల్లో ప్రేమ, ఆదరణ, సేవా భావం పెంపొందుతాయని తెలిపారు. చిన్నారుల ముఖాల్లో చిరునవ్వులు చూడటం విద్యార్థులకు సంతృప్తిని కలిగించిందన్నారు. సమాజంలోని అవసరమైన వారికి అండగా నిలవాలనే ఆలోచన విద్యార్థుల్లో పెంపొందించేందుకు భవిష్యత్తులో కూడా మరిన్ని సేవా కార్యక్రమాలను చేపట్టనున్నట్లు తెలిపారు.

కార్యక్రమంలో పాఠశాల ఉపాధ్యాయ బృందం, అనాథాశ్రమ నిర్వాహకులు, విద్యార్థులు పాల్గొన్నారు.