నారాయణఖేడ్ మండలం పీర్లతాండా వద్ద ప్రభుత్వ అసైన్డ్ భూమిలో అక్రమంగా రోడ్డు నిర్మిస్తున్న వారిపై చర్యలు తీసుకోవాలని బహుజన సమాజ్ పార్టీ నారాయణఖేడ్ నియోజకవర్గ అధ్యక్షులు అనుముల తుకారాం కోరారు. సోమవారం ఖేడ్ సబ్‌కలెక్టర్ కార్యాలయంలో నిర్వహించిన ప్రజావాణిలో సబ్‌కలెక్టర్ ఉమాహారతికి వినతిపత్రం అందజేశారు. ఈ సందర్భంగా ఆయన మాట్లాడుతూ పీర్లతాండా వద్ద సర్వే నంబర్ 120/50 నుంచి కొందరు వ్యక్తులు తమ వ్యక్తిగత భూములకు వెళ్లేందుకు సుమారు 40 అడుగుల వెడల్పుతో ప్రభుత్వ అసైన్డ్ భూమిలో అక్రమంగా రోడ్డు నిర్మిస్తున్నారని తెలిపారు. గతంలో అధికారుల ఆదేశాల మేరకు తహసీల్దార్ చంద్రమోహన్‌రెడ్డి, నాయబ్ తహసీల్దార్ రాజు పాటిల్, గిర్ధావర్ మాధవరెడ్డి అక్కడికి వెళ్లి పనులను నిలిపివేసినప్పటికీ తిరిగి రోడ్డు పనులు కొనసాగిస్తున్నారని పేర్కొన్నారు. ఈ విషయంపై పాతులోత్ ప్రేమ్‌సింగ్ కూడా పోలీసులకు ఫిర్యాదు చేసినట్లు తెలిపారు. ప్రస్తుతం నిర్మిస్తున్న రోడ్డు వల్ల తాండా ప్రజలకు ఎలాంటి ప్రయోజనం లేదని, కొందరి వ్యక్తిగత భూములకు మాత్రమే ఉపయోగపడేలా రోడ్డు వేస్తున్నారని ఆరోపించారు. ప్రభుత్వ అసైన్డ్ భూమిని అక్రమంగా వినియోగిస్తున్న వారిపై విచారణ జరిపి చట్టపరంగా చర్యలు తీసుకోవాలని అనుముల తుకారాం సబ్‌కలెక్టర్‌ను కోరారు.