భువనగిరి: మహాత్మా గాంధీ జాతీయ గ్రామీణ ఉపాధి హామీ చట్టాన్ని కొనసాగించాలని, కేంద్ర ప్రభుత్వం తీసుకొచ్చిన వి‌బి-జి రాంజీ చట్టాన్ని రద్దు చేయాలని డిమాండ్ చేస్తూ ఈ నెల 15న దేశవ్యాప్తంగా నిర్వహించే గ్రామీణ సమ్మెకు సహకరించాలని తెలంగాణ వ్యవసాయ కార్మిక సంఘం నాయకులు పిలుపునిచ్చారు.

ఈ మేరకు యాదాద్రి భువనగిరి జిల్లా గ్రామీణ అభివృద్ధి అధికారి టి. నాగిరెడ్డికి తెలంగాణ వ్యవసాయ కార్మిక సంఘం జిల్లా కమిటీ ఆధ్వర్యంలో సమ్మె నోటీసును జిల్లా అధ్యక్షుడు బొల్లు యాదగిరి, ప్రధాన కార్యదర్శి కొండమడుగు నర్సింహ, జిల్లా ఉపాధ్యక్షుడు, చీమలకొండూరు సర్పంచ్ పల్లెర్ల అంజయ్య అందజేశారు.

ఈ సందర్భంగా నాయకులు మాట్లాడుతూ.. గ్రామీణ ఆర్థిక వ్యవస్థలో కీలక పాత్ర పోషిస్తున్న ఉపాధి హామీ కార్మికులు కొత్త చట్టాల వల్ల తీవ్ర ఇబ్బందులు ఎదుర్కొంటున్నారని ఆవేదన వ్యక్తం చేశారు. ప్రభుత్వం తీసుకొచ్చిన కొత్త జీవోలతో గతంలో ఉన్న అనేక హక్కులు కోల్పోయారని అన్నారు.

పనికి వెళ్లినా ఎంత కూలి వస్తుందో తెలియని పరిస్థితి నెలకొందని, చేసిన పనికి వేతనాలు ఎప్పుడు వస్తాయో తెలియక కుటుంబ పోషణ భారంగా మారిందన్నారు. పెండింగ్ వేతనాలను వెంటనే చెల్లించాలని, ఉపాధి హామీ కార్మికులకు సంవత్సరానికి 200 రోజుల పని కల్పించి రోజుకు రూ.800 కూలి ఇవ్వాలని డిమాండ్ చేశారు.

రోజుకు రెండుసార్లు ఫోటోలు తీసే ఈ-కేవైసీ విధానాన్ని రద్దు చేయాలని, పని ప్రదేశాల్లో తాగునీరు, టెంట్లు, మెడికల్ కిట్ వంటి సౌకర్యాలు కల్పించాలని కోరారు. ప్రమాదాలు జరిగితే ఉచిత వైద్యం అందించడంతో పాటు కార్మికులందరికీ బీమా సౌకర్యం కల్పించాలని డిమాండ్ చేశారు.

అలాగే పనిముట్లు అందజేయాలని, కేంద్ర ప్రభుత్వం 90 శాతం నిధులు కేటాయించాలని, పట్టణ ప్రాంతాల్లో కూడా ఉపాధి హామీ పనులు అమలు చేయాలని కోరారు. తమ డిమాండ్ల సాధన కోసం మే 15న జరిగే గ్రామీణ సమ్మెలో ఉపాధి హామీ కార్మికులు పెద్ద ఎత్తున పాల్గొని విజయవంతం చేయాలని పిలుపునిచ్చారు.