రామన్నపేట: మండల కేంద్రంలోని డాన్ బాస్కో హైస్కూల్ ఎదురుగా ఉన్న గోదాంలో నోట్‌బుక్స్ నిల్వ ఉంచి విక్రయిస్తున్నారనే ఆరోపణలతో ఎస్‌ఎఫ్‌ఐ నాయకులు శుక్రవారం ఆందోళన చేపట్టారు. గోదాంను పరిశీలించి అక్కడ ఉన్న నోట్‌బుక్స్ ఫొటోలు తీశారు. అనంతరం గోదాం ముందు నిరసన వ్యక్తం చేస్తూ విద్యార్థులకు ప్రైవేటు పుస్తకాల విక్రయాలను అరికట్టాలని, సంబంధిత అధికారులతో విచారణ జరిపించి బాధ్యులపై చర్యలు తీసుకోవాలని డిమాండ్ చేశారు.

స్కూలు బయట గోదాంపై చర్యలు తీసుకోలేం: ఏడీ శేషాచారి

రామన్నపేట: డాన్ బాస్కో స్కూల్‌కు సంబంధించినట్లు ప్రచారంలో ఉన్న బయట స్టోరేజ్ గోదాం వ్యవహారంపై విద్యాశాఖ ఏడీ శేషాచారి స్పందించారు. ఈ విషయమై డీఈఓ భిక్షపతితో ఫోన్‌లో మాట్లాడిన ఆయన, పాఠశాల ఆవరణకు వెలుపల ఉన్న గోదాంపై విద్యాశాఖకు ప్రత్యక్ష పరిధి ఉండదని స్పష్టం చేసినట్లు సమాచారం.

ఎస్‌ఎఫ్‌ఐ నాయకులు గోదాంను సందర్శించి నిరసన వ్యక్తం చేసిన నేపథ్యంలో స్పందించిన ఆయన, నిబంధనలకు విరుద్ధంగా ఏవైనా వస్తువులు పాఠశాల ఆవరణలోనే గుర్తిస్తే వెంటనే విచారణ చేపట్టి, నిబంధనల మేరకు చర్యలు తీసుకుంటామని తెలిపారు. పాఠశాల వెలుపల ఉన్న ప్రైవేటు గోదాం వ్యవహారం విద్యాశాఖ పరిధిలోకి రాదని పేర్కొన్నట్లు తెలిసింది.