చైతన్యపురి

ఓటరు జాబితా ప్రత్యేక సమగ్ర సవరణ కార్యక్రమంలో భాగంగా ఎన్యుమరేషన్ ఫారాల ద్వారా సేకరించిన వివరాలను బీఎల్ఓ యాప్‌లో ఖచ్చితంగా నమోదు చేయాలని జిల్లా కలెక్టర్ సి. నారాయణరెడ్డి అధికారులను ఆదేశించారు. శుక్రవారం ఎల్బీనగర్ జోన్ పరిధిలో ఇంటింటి ఎన్యుమరేషన్ ప్రక్రియను పరిశీలించారు.

ప్రతి ఇంటిని సందర్శించి అర్హులైన ఓటర్లకు ఫారాలు అందజేయడంతో పాటు, పూర్తి చేసిన వివరాలను వెంటనే యాప్‌లో నమోదు చేయాలని సూచించారు. ఓటరు జాబితాలో నకిలీ నమోదులు, అనర్హుల పేర్లు, సాంకేతిక తప్పిదాలకు తావులేకుండా పారదర్శకంగా జాబితా రూపొందించాలని ఆదేశించారు.

మరణించిన ఓటర్ల పేర్ల తొలగింపు, డూప్లికేట్ ఈపీఐసీ కార్డుల గుర్తింపు, నివాసం మారిన వారి వివరాల నవీకరణను బాధ్యతగా చేపట్టాలని సూచించారు. ప్రతి అర్హుడికి ఒకే ఓటరు గుర్తింపు కార్డు ఉండేలా చర్యలు తీసుకోవాలని, బీఎల్ఓలు ఎన్నికల సంఘం మార్గదర్శకాలను పాటిస్తూ నిర్ణీత గడువులోగా ఎన్యుమరేషన్ పూర్తి చేయాలని కలెక్టర్ ఆదేశించారు.