బాల్యవివాహాల నిరోధానికి కఠిన చర్యలు: సర్పంచ్ భారతమ్మ

చిన్నారుల హక్కులు, సంరక్షణ కోసమే కమిటీ: ఎం. మత్స్యగిరి

చౌటుప్పల్ మండల పరిధిలోని జై కేసారం గ్రామంలో జిల్లా బాలల పరిరక్షణ విభాగం (డిసీపియు) ఆధ్వర్యంలో సోమవారం 'బాలల పరిరక్షణ కమిటీ'ని ఏర్పాటు చేశారు. ఈ సందర్భంగా డీసీపీయూ సోషల్ వర్కర్ ఎం. మత్స్యగిరి మాట్లాడుతూ.. గ్రామస్థాయిలో పిల్లల రక్షణ, సంరక్షణ కోసం సర్పంచ్ చైర్మన్‌గా 14 మంది సభ్యులతో ఈ కమిటీని ఏర్పాటు చేసినట్లు తెలిపారు. అనాధ పిల్లలకు స్కాలర్‌షిప్ సౌకర్యం ఉందన్న ఆయన, దత్తత ప్రక్రియను చట్టబద్ధంగానే చేపట్టాలని సూచించారు. గ్రామంలో పిల్లల సమస్యలపై కమిటీలో చర్చించి పరిష్కరిస్తామన్నారు. ​గ్రామ సర్పంచ్ సమ్మిరెడ్డి భారతమ్మ మాట్లాడుతూ.. గ్రామంలో బాల్యవివాహాలు జరగకుండా చూడాలని, బడి మానేసిన పిల్లలపై ప్రత్యేక దృష్టి సారించాలని తెలిపారు. ప్రతి నెలా కమిటీ సమావేశం నిర్వహించాలన్నారు. ఈ కార్యక్రమంలో పంచాయతీ కార్యదర్శి దశరథ, స్కోప్ (ఎన్ జీఓ) ప్రతినిధి నరసింహరాజు, ఉపాధ్యాయులు, అంగన్వాడీ, ఆశా కార్యకర్తలు, సంఘాల నాయకులు తదితరులు పాల్గొన్నారు.