ఏకగ్రీవ ఎన్నిక – క్రీడల అభివృద్ధికి కృషి చేస్తానన్న ఎమ్మెల్యే

ఉమ్మడి నల్గొండ జిల్లా ఒలింపిక్ అసోసియేషన్ అధ్యక్షుడిగా నకిరేకల్ ఎమ్మెల్యే వేముల వీరేశం ఏకగ్రీవంగా ఎన్నికయ్యారు. ఈ సందర్భంగా క్రీడా వర్గాలు, ప్రజాప్రతినిధులు, అసోసియేషన్ సభ్యులు ఆయనకు అభినందనలు తెలియజేశారు.

అధ్యక్షుడిగా ఎన్నికైన అనంతరం నిర్వహించిన జనరల్ బాడీ సమావేశంలో ఎమ్మెల్యే వేముల వీరేశం పాల్గొన్నారు. జిల్లాలో క్రీడల అభివృద్ధికి ప్రత్యేక చర్యలు చేపట్టాలని, యువతలో క్రీడా స్పూర్తి పెంపొందించాల్సిన అవసరం ఉందని ఆయన పేర్కొన్నారు. గ్రామీణ ప్రాంతాల నుంచి ప్రతిభావంతులైన క్రీడాకారులను గుర్తించి వారికి అవసరమైన ప్రోత్సాహం, సదుపాయాలు కల్పించేందుకు కృషి చేస్తామని తెలిపారు.

క్రీడలు యువత శారీరక, మానసిక దృఢత్వానికి ఎంతో దోహదపడతాయని, రాష్ట్ర మరియు జాతీయ స్థాయిలో రాణించే అవకాశాలను కూడా కల్పిస్తాయని చెప్పారు. అసోసియేషన్ సభ్యులందరూ సమన్వయంతో పని చేసి జిల్లాలో క్రీడా రంగాన్ని మరింత అభివృద్ధి పరచాలని ఆయన పిలుపునిచ్చారు.

ఈ సమావేశంలో అసోసియేషన్ సభ్యులు, క్రీడా ప్రతినిధులు, పలువురు నాయకులు పాల్గొన్నారు.