డాక్టర్ బీఆర్ అంబేద్కర్ ఓపెన్ యూనివర్సిటీ సహకారంతో స్వామి రామానంద తీర్థ రూరల్ ఇన్‌స్టిట్యూట్ ఆధ్వర్యంలో ఉచిత నైపుణ్య శిక్షణ కార్యక్రమాలు నిర్వహిస్తున్నట్లు బీఆర్ఎవోయూ జాయింట్ డైరెక్టర్, ఎస్సీ–ఎస్టీ సెల్ లైజన్ ఆఫీసర్ డాక్టర్ బి. ధర్మానాయక్ తెలిపారు.

నల్లగొండలోని ఎన్జీ కళాశాల ప్రాంగణంలో ఉన్న బీఆర్ఎవోయూ ఉమ్మడి జిల్లా రీజినల్ కోఆర్డినేషన్ సెంటర్‌ను ఆయన సందర్శించారు. ఈ సందర్భంగా మాట్లాడుతూ యూనివర్సిటీ వీసీ ప్రొఫెసర్ ఘంటా చక్రపాణి ఆలోచనలతో విద్యారంగంలో పలు వినూత్న కార్యక్రమాలు చేపడుతున్నట్లు పేర్కొన్నారు.

గ్రామీణ ప్రాంతాల నిరుద్యోగ యువతకు సాంకేతిక, ఉపాధి ఆధారిత కోర్సులు అందించడమే లక్ష్యంగా స్వామి రామానంద తీర్థ రూరల్ ఇన్‌స్టిట్యూట్ ద్వారా ఉచిత శిక్షణ అందిస్తున్నట్లు తెలిపారు. పూర్తి వివరాల కోసం నల్లగొండలోని యూనివర్సిటీ రీజినల్ సెంటర్‌ను లేదా ఉమ్మడి జిల్లాలోని యూనివర్సిటీ అధ్యయన కేంద్రాలను సంప్రదించాలని సూచించారు.

ఈ సమావేశంలో బీఆర్ఎవోయూ ఉమ్మడి జిల్లా రీజినల్ కోఆర్డినేటర్ డాక్టర్ బొజ్జ అనిల్‌కుమార్, సీనియర్ జూనియర్ అసిస్టెంట్లు శ్రీకాంత్, బద్దం మహేశ్ తదితరులు పాల్గొన్నారు.