తడిసిన ప్రతి వరి ధాన్యాన్ని ప్రభుత్వం కొనుగోలు చేయాలని, మార్కెట్ యార్డుల్లో జోకిన ధాన్యాన్ని వెంటనే మిల్లులకు తరలించాలని తెలంగాణ రైతు సంఘం రాష్ట్ర కమిటీ సభ్యులు బూరుగు కృష్ణారెడ్డి డిమాండ్ చేశారు. సోమవారం చౌటుప్పల్ వ్యవసాయ మార్కెట్ కార్యాలయం ఎదుట రైతులతో కలిసి ధర్నా నిర్వహించారు.ఈ సందర్భంగా ఆయన మాట్లాడుతూ.. ధాన్యం కొనుగోలు కేంద్రాలు ప్రారంభించి నెల రోజులు గడుస్తున్నా ధాన్యం తరలింపులో అధికారులు నిర్లక్ష్యం వహిస్తున్నారని ఆరోపించారు. తూకాలు, తాలు పేరుతో రైతులను ఇబ్బందులకు గురిచేస్తున్నారని విమర్శించారు. ప్రభుత్వం ధాన్యం కొంటుందనే ఆశతో రైతులు వందల క్వింటాళ్ల ధాన్యాన్ని మార్కెట్ యార్డులకు తీసుకువచ్చి పోస్తే, ఆదివారం కురిసిన అకాల వర్షాలకు ధాన్యం తడిసి ముద్దయిందన్నారు.

తడిసిన ధాన్యాన్ని కొనుగోలు చేయకుండా అధికారులు రైతులను ఇబ్బంది పెడుతున్నారని ఆవేదన వ్యక్తం చేశారు. మిల్లర్లతో సమన్వయం చేసుకుని ధాన్యాన్ని వేగంగా మిల్లులకు తరలించేలా చర్యలు తీసుకోవాలని కోరారు. అవసరమైన చోట హమాలీల సంఖ్య పెంచడంతో పాటు అదనపు కొనుగోలు కేంద్రాలు ఏర్పాటు చేయాలని డిమాండ్ చేశారు. రైతులు తీసుకొచ్చిన ధాన్యం కల్లాల్లో ఎక్కువ రోజులు నిల్వ ఉండకుండా త్వరితగతిన కొనుగోళ్లు పూర్తి చేయాలని, ధాన్యం అమ్మిన రైతులకు సకాలంలో చెల్లింపులు చేయాలని సూచించారు. అకాల వర్షాల నేపథ్యంలో ధాన్యాన్ని వెంటనే మిల్లులకు తరలించేందుకు అధికారులు చర్యలు తీసుకోవాలని, ధాన్యం ఎక్కువగా ఉన్న కేంద్రాలకు లారీలు పంపించాలని కోరారు.

పది రోజుల్లో మార్కెట్ యార్డుల్లోని ధాన్యాన్ని తరలించకపోతే రైతు సంఘం ఆధ్వర్యంలో పెద్ద ఎత్తున ఆందోళనలు చేపడతామని హెచ్చరించారు. ఈ కార్యక్రమంలో తెలంగాణ రైతు సంఘం రాష్ట్ర కమిటీ సభ్యులు చీర్క అలివేలు, సిపిఎం పార్టీ జిల్లా కమిటీ సభ్యులు ఎండి పాషా, సిపిఎం పార్టీ మున్సిపల్ కార్యదర్శి గోశిక కరుణాకర్, బండారు నరసింహ, రైతు సంఘం నాయకులు ఆకుల ధర్మయ్య, పర్ని ధర్మారెడ్డి, బొడ్డు అంజిరెడ్డి, పొట్ట శ్రీను, బొజ్జ బాలయ్య, జక్కిడి గోపాల్ రెడ్డి, అంజిరెడ్డి, చీర్క సంజీవరెడ్డి, పడమటి కృష్ణారెడ్డి, లింగయ్య, కృష్ణ, సప్పిడి శ్రీనివాస్ రెడ్డి తదితరులు పాల్గొన్నారు.