చిట్యాల 649 సర్వే నంబర్‌పై అధికారుల నిశ్శబ్దం.. తప్పిదమా? తాత్సారమా?

చిట్యాల: నల్గొండ జిల్లా చిట్యాల మున్సిపాలిటీ పరిధిలోని సర్వే నంబర్‌ 649లో ఉన్న టీటీడీ భూమికి సంబంధించి సర్వే పూర్తయినట్లు సమాచారం. భూమి హద్దులు, విస్తీర్ణం తదితర అంశాలపై అధికారులు క్షేత్రస్థాయిలో పరిశీలన పూర్తి చేసినప్పటికీ, తదుపరి నిర్ణయం విషయంలో మాత్రం జాప్యం ఎందుకు జరుగుతోందన్న ప్రశ్నలు స్థానికంగా వినిపిస్తున్నాయి.

టీటీడీ కల్యాణ మండపం కోసం కేటాయించినట్లు చెబుతున్న ఈ భూమిపై గత కొంతకాలంగా వివిధ అంశాలు చర్చనీయాంశంగా మారాయి. ఈ నేపథ్యంలో సర్వే పూర్తయిన అనంతరం భూమి వాస్తవ పరిస్థితిపై అధికారికంగా స్పష్టత ఇవ్వడంతో పాటు, తదుపరి చర్యలపై నిర్ణయం తీసుకోవాల్సిన అవసరం ఉంది.

సర్వే పూర్తయినప్పటికీ సంబంధిత అధికారులు నిర్ణయం తీసుకోవడంలో ఎందుకు ఆలస్యం చేస్తున్నారనే దానిపై ప్రజల్లో అనుమానాలు వ్యక్తమవుతున్నాయి.

ఇది అధికారుల తప్పిదమా? లేక నిర్ణయం తీసుకోవడంలో తాత్సారమా? అనే ప్రశ్నలు తలెత్తుతున్నాయి.

టీటీడీకి సంబంధించిన భూమి కావడంతో వ్యవహారాన్ని పారదర్శకంగా పరిష్కరించి, సర్వే నివేదికను బహిర్గతం చేసి, భూమి పరిరక్షణకు అవసరమైన చర్యలు వెంటనే చేపట్టాలని స్థానికులు కోరుతున్నారు. అధికారులు జాప్యానికి కారణాలను వెల్లడించి, తదుపరి కార్యాచరణపై స్పష్టత ఇవ్వాలని డిమాండ్ చేస్తున్నారు.