దళిత జర్నలిస్టుల సంక్షేమం కోసం ప్రభుత్వం ప్రత్యేక చర్యలు చేపట్టి, వారి సమస్యలను పరిష్కరించాలని దళిత జర్నలిస్టుల సంఘం వ్యవస్థాపక అధ్యక్షులు కాషాపొగు జాన్ డిమాండ్ చేశారు. మంగళవారం సంగారెడ్డి జిల్లా దళిత జర్నలిస్టుల సంఘం నూతన కార్యవర్గాన్ని ఏకగ్రీవంగా ఎన్నుకున్నారు. కాషాపొగు జాన్, రాష్ట్ర అధ్యక్షులు యాదగిరి ఆధ్వర్యంలో జరిగిన ఎన్నికల్లో జిల్లా అధ్యక్షుడిగా రామని అశోక్ ఏకగ్రీవంగా ఎన్నికయ్యారు. ఈ సందర్భంగా కాషాపొగు జాన్ మాట్లాడుతూ అంబేద్కర్ అభయహస్తం పథకం కింద రూ.12 లక్షల ఆర్థిక సహాయం అందించాలని, ఇల్లు లేదా ఇంటి స్థలం లేని దళిత జర్నలిస్టులకు ఇళ్లు, ఇంటి స్థల పట్టాలు మంజూరు చేయాలని కోరారు. అలాగే ఉచిత బస్సు పాస్ సౌకర్యం, ప్రభుత్వ ఆరోగ్య కార్డులు అందించడంతో పాటు జర్నలిస్టుల సంక్షేమానికి ప్రత్యేక పథకాలు అమలు చేయాలని విజ్ఞప్తి చేశారు. నూతన జిల్లా అధ్యక్షులు రామని అశోక్ మాట్లాడుతూ దళిత జర్నలిస్టుల సమస్యలను ప్రభుత్వం దృష్టికి తీసుకెళ్లి పరిష్కారానికి కృషి చేస్తానని, జర్నలిస్టుల హక్కులు, సంక్షేమం కోసం సంఘాన్ని మరింత బలోపేతం చేస్తామని తెలిపారు. రాష్ట్ర అధ్యక్షులు యాదగిరి మాట్లాడుతూ దళిత జర్నలిస్టుల న్యాయమైన డిమాండ్లను ప్రభుత్వం సానుకూలంగా పరిశీలించాలని కోరారు. సమస్యలు పరిష్కారమయ్యే వరకు సంఘం తరఫున నిరంతరం పోరాటం కొనసాగిస్తామని స్పష్టం చేశారు. ఈ కార్యక్రమంలో రాష్ట్ర వర్కింగ్ ప్రెసిడెంట్ రత్న కుమార్, ఉమ్మడి మెదక్ జిల్లా అధ్యక్షులు రాపాక విజయరాజు, సీనియర్ జర్నలిస్టులు విలాస్, రాజు, మన్నే పోచయ్య, అశోక్‌తో పాటు పలువురు దళిత జర్నలిస్టులు పాల్గొన్నారు.