రామన్నపేటలో 9 రోజుల యోగశిక్షణా తరగతులకు ఏర్పాట్లు పూర్తి

రామన్నపేట: ఆరోగ్యకర జీవనానికి యోగ సాధన అత్యంత అవసరమని సర్కిల్ ఇన్స్పెక్టర్ ఎన్. వెంకటేశ్వర్లు పేర్కొన్నారు. రామన్నపేటలో నిర్వహించనున్న తొమ్మిది రోజుల యోగశిక్షణా తరగతుల బ్రోచర్‌ను ఆయన సబ్ ఇన్స్పెక్టర్ డి. నాగరాజుతో కలిసి ఆవిష్కరించారు.

అమృతవనం అగ్రిఫామ్ రిసార్టులో ఈ నెల 29 నుంచి వచ్చే నెల 6 వరకు శ్రీ శిరిడి సాయి అష్టాంగ ఆధ్వర్యంలో యోగ శిక్షణ తరగతులు జరగనున్నాయి. ప్రతిరోజూ ఉదయం 5.30 నుంచి 7 గంటల వరకు, సాయంత్రం 6.30 నుంచి 8 గంటల వరకు శిక్షణ ఇవ్వనున్నారు.

ఈ కార్యక్రమంలో యోగా గురువు యోగేశ్వర్, రిసార్ట్ వ్యవస్థాపకులు డాక్టర్ కడారి చంద్రశేఖర్ రెడ్డి తదితరులు పాల్గొన్నారు. శిక్షణలో భాగంగా వ్యాయామాలు, ప్రాణాయామాలు, సూర్య నమస్కారాలు, ధ్యానం, ఆసనాలు నేర్పించడంతో పాటు ‘అమృత ఆహారం’ అందించనున్నట్లు నిర్వాహకులు తెలిపారు.

యోగాన్ని ప్రతి ఒక్కరూ జీవితంలో భాగంగా చేసుకోవాలని సీఐ సూచించారు. శిక్షణలో పాల్గొనదలచిన వారు 9603256572 నంబరును సంప్రదించాలని కోరారు.