రామన్నపేట మండలం లక్ష్మాపురం గ్రామానికి చెందిన మాజీ తొలి సర్పంచ్ జోగుల రామలింగయ్య కనిష్ఠ కుమారుడు, సికింద్రాబాద్ అడిషనల్ డిప్యూటీ కమిషనర్‌ జోగుల నరసయ్య రాష్ట్రపతి చేతుల మీదుగా ఉత్తమ పోలీసు అవార్డు అందుకున్న సందర్భంగా గ్రామస్తులు ఆయనను ఘనంగా అభినందించారు.ఈ సందర్భంగా పలువురు మాట్లాడుతూ.. మారుమూల ప్రాంతమైన లక్ష్మాపురం గ్రామం నుంచి చిన్ననాటి నుంచే కష్టపడి ఉన్నత స్థాయికి ఎదిగి, రాష్ట్రపతి చేతుల మీదుగా ప్రతిష్టాత్మక అవార్డు అందుకోవడం గ్రామానికి గర్వకారణమన్నారు. పోలీసు అధికారిగా బాధ్యతలు నిర్వర్తించడంతోపాటు గ్రామ అభివృద్ధికి కూడా నరసయ్య అనేక సందర్భాల్లో తనవంతు సహకారం అందించారని కొనియాడారు.భవిష్యత్తులోనూ గ్రామ అభివృద్ధిలో కీలకపాత్ర పోషిస్తూ మరిన్ని సేవలు అందించాలని ఆకాంక్షించారు. నరసయ్యకు అవార్డు రావడం గ్రామ యువతకు స్ఫూర్తిదాయకమని పేర్కొన్నారు.అభినందనలు తెలిపిన వారిలో మాజీ సర్పంచ్ ఉప్పు ప్రకాష్, శంభాల వెంకటేష్, నీల ఐలయ్య, మరోజు అనంతచారి, బత్తిని వెంకటేష్, వేముల పాపయ్య, బత్తుల రమేష్, ఆరూరి నరేష్, వంగల మల్లికార్జున్ తదితరులు ఉన్నారు.