ఎల్బీనగర్,

మెగా పవర్ స్టార్ రామ్ చరణ్పు ట్టినరోజు సందర్భంగా మెగాస్టార్ చిరంజీవి సేవా కార్యక్రమాలతో మరోసారి తన ఉదారతను చాటుకున్నారు.

హైదరాబాద్ నగరంలోని జూబ్లీహిల్స్‌లో ఉన్న చిరంజీవి బ్లడ్ బ్యాంకు లో రామ్ చరణ్ జన్మదిన వేడుకలు ఘనంగా నిర్వహించారు. తనయుడి పుట్టినరోజును పురస్కరించుకుని చిరంజీవి స్వయంగా ఈ కార్యక్రమాన్ని నిర్వహించారు.

ఈ సందర్భంగా ‘రెడీ టు సర్వ్’ వృద్ధాశ్రమానికి రూ.2 లక్షల ఆర్థిక సాయాన్ని ప్రకటించారు. ఆ మొత్తానికి సంబంధించిన చెక్కును ఆశ్రమ నిర్వాహకుడు పెద్ది శంకర్‌కు అందజేశారు. ఆశ్రమంలోని వృద్ధులకు కొత్త బట్టలు పంపిణీ చేయడంతో పాటు, వారికి ప్రత్యేకంగా భోజనం వడ్డించారు.

వృద్ధులకు సేవ చేయడంలో ‘రెడీ టు సర్వ్’ సంస్థ చేస్తున్న సేవలను చిరంజీవి అభినందించారు. నిర్వాహకుడు పెద్ది శంకర్ చేస్తున్న సేవలు స్ఫూర్తిదాయకమని కొనియాడారు.

ఈ విరాళాన్ని వృద్ధాశ్రమానికి శాశ్వత స్థలం ఏర్పాటు కోసం వినియోగిస్తామని నిర్వాహకులు తెలిపారు. మెగాస్టార్ అందించిన మద్దతుతో ఆశ్రమ అభివృద్ధికి మరింత ఊతం లభిస్తుందని వారు పేర్కొన్నారు.