నకిరేకల్‌లో ఘనంగా గ్రామ పాలకవర్గాల ప్రమాణ స్వీకారం

స్థానికం ప్రతినిధి కొండ మల్లేశం గౌడ్

నకిరేకల్ నియోజకవర్గ పరిధిలోని నకిరేకల్ మండలం తాటికల్, వల్లభాపురం, కడపర్తి గ్రామాల్లో నూతనంగా ఎన్నికైన సర్పంచ్‌లు, పాలకవర్గాల ప్రమాణ స్వీకార కార్యక్రమాలు ఆదివారం ఘనంగా జరిగాయి.

తాటికల్ గ్రామ సర్పంచ్ బట్టు రవి, వల్లభాపురం గ్రామ సర్పంచ్ తీగల వెంకటయ్య, కడపర్తి గ్రామ సర్పంచ్ గొర్ల వీరయ్యలతో పాటు నూతన పాలకవర్గం సభ్యులు బాధ్యతలు స్వీకరించారు. ఈ కార్యక్రమాలకు నకిరేకల్ మాజీ ఎమ్మెల్యే చిరుమర్తి లింగయ్య ముఖ్య అతిథిగా హాజరయ్యారు.

ఈ సందర్భంగా ఆయన నూతనంగా ప్రమాణ స్వీకారం చేసిన సర్పంచ్‌లు, పాలకవర్గ సభ్యులకు శుభాకాంక్షలు తెలిపారు. గ్రామాభివృద్ధే లక్ష్యంగా సమిష్టిగా పనిచేసి ప్రజల నమ్మకాన్ని నిలబెట్టుకోవాలని సూచించారు. గ్రామాల్లో మౌలిక వసతుల అభివృద్ధి, సంక్షేమ పథకాల అమలుపై ప్రత్యేక శ్రద్ధ తీసుకోవాలని ఆయన అన్నారు.

ప్రమాణ స్వీకార కార్యక్రమాలు ఉత్సాహభరిత వాతావరణంలో సాగగా, స్థానిక నాయకులు, కార్యకర్తలు, గ్రామ ప్రజలు పెద్ద సంఖ్యలో పాల్గొని నూతన పాలకవర్గాన్ని అభినందించారు.