రోబోటిక్‌ టెక్నాలజీతో మరింత కచ్చితత్వం.. వేగంగా కోలుకునే అవకాశం.

యశోద ఆసుపత్రి థొరాసిక్‌ సర్జన్‌ డాక్టర్‌ రోహన్‌రెడ్డి..

నల్గొండ: ఛాతీకి సంబంధించిన సంక్లిష్ట వ్యాధులకు ఆధునిక శస్త్రచికిత్స విధానాలతో మెరుగైన వైద్యం అందుబాటులోకి వచ్చిందని సోమాజిగూడ యశోద ఆసుపత్రి థొరాసిక్‌ సర్జన్‌ డాక్టర్‌ రోహన్‌రెడ్డి సి. తెలిపారు. వీడియో అసిస్టెడ్‌ థొరాసిక్‌ సర్జరీ (వీఏటీఎస్‌), రోబోట్‌ అసిస్టెడ్‌ థొరాసిక్‌ సర్జరీ (రాట్స్‌) వంటి ఆధునిక పద్ధతులతో చిన్న కోతల ద్వారానే శస్త్రచికిత్సలు నిర్వహిస్తున్నట్లు వివరించారు. నల్గొండ పట్టణంలోని వెంకటేశ్వర రెస్టారెంట్‌లో యశోద ఆసుపత్రి ఆధ్వర్యంలో నిర్వహించిన విలేకరుల సమావేశంలో ఆయన మాట్లాడారు.

తక్కువ నొప్పి.. త్వరగా కోలుకునే అవకాశం.

థొరాసిక్‌ సర్జరీలో గత పదేళ్లుగా గణనీయమైన మార్పులు చోటుచేసుకున్నాయని డాక్టర్‌ రోహన్‌రెడ్డి పేర్కొన్నారు. గతంలో ఛాతీని పూర్తిగా తెరిచి శస్త్రచికిత్సలు నిర్వహించాల్సి వచ్చేదని, ప్రస్తుతం అధునాతన సాంకేతికతతో చిన్న కోతల ద్వారానే చికిత్స అందిస్తున్నట్లు చెప్పారు. ఈ విధానాలతో శస్త్రచికిత్స అనంతరం నొప్పి, గాయం తగ్గడంతోపాటు ఆసుపత్రిలో ఉండాల్సిన సమయం కూడా తగ్గుతుందన్నారు. రోగులు త్వరగా కోలుకుని సాధారణ జీవనానికి చేరుకునే అవకాశం ఉంటుందని వివరించారు. రోబోటిక్‌ సాంకేతికతతో శస్త్రచికిత్సలను మరింత కచ్చితత్వంతో నిర్వహించవచ్చని తెలిపారు.

క్యాన్సర్‌ను ముందుగానే గుర్తించాలి

ఊపిరితిత్తులు, అన్నవాహిక క్యాన్సర్లను ప్రారంభ దశలో గుర్తిస్తే మెరుగైన చికిత్స అందించేందుకు అవకాశం ఉంటుందని డాక్టర్‌ రోహన్‌రెడ్డి తెలిపారు. ఊపిరితిత్తులు, అన్నవాహికతోపాటు ఛాతీ మధ్యభాగంలోని అవయవాలు, డయాఫ్రమ్‌, ఛాతీ గోడకు సంబంధించిన సంక్లిష్ట వ్యాధులకు ఆధునిక వైద్య విధానాలు ఉపయోగపడుతున్నాయని చెప్పారు. థొరాసిక్‌ సర్జన్లు, పల్మోనాలజిస్టులు, ఆంకాలజిస్టులు, రేడియాలజిస్టులు, అనస్థీషియాలజిస్టులు, క్రిటికల్‌ కేర్‌ నిపుణులు సమన్వయంతో పనిచేయడం ద్వారా మెరుగైన చికిత్స ఫలితాలు సాధ్యమవుతున్నాయని పేర్కొన్నారు.యశోద ఆసుపత్రిలో అధునాతన ఆపరేషన్‌ థియేటర్లు, హైడెఫినిషన్‌ ఇమేజింగ్‌ వ్యవస్థలు, రోబోటిక్‌ సర్జికల్‌ ప్లాట్‌ఫారమ్‌లతో ఛాతీ సంబంధిత వ్యాధులకు సమగ్ర వైద్యం అందిస్తున్నట్లు తెలిపారు. ప్రారంభ దశలోని ఊపిరితిత్తుల క్యాన్సర్‌, అన్నవాహిక వ్యాధులు, ఛాతీలోని కణితులు, అత్యవసర సమస్యలకు మినిమల్లీ ఇన్వాసివ్‌ విధానాల్లో చికిత్స అందిస్తున్నట్లు వివరించారు. ఈ కార్యక్రమంలో యశోద ఆసుపత్రి సీనియర్‌ మేనేజర్‌ ఉమేష్‌, అసిస్టెంట్‌ మేనేజర్‌ వినోద్‌ తదితరులు పాల్గొన్నారు.