రేవంత్ రెడ్డి ఆదేశాలు

గ్రేటర్ హైదరాబాద్ మున్సిపల్ కార్పొరేషన్ చట్టం స్థానంలో కొత్త విధానం

రాష్ట్రంలోని మూడు ప్రధాన నగర కార్పొరేషన్లకు ప్రత్యేక చట్టాన్ని రూపొందించాలని ముఖ్యమంత్రి రేవంత్ రెడ్డి గారు ఆదేశించారు. ప్రస్తుతం అమల్లో ఉన్న గ్రేటర్ హైదరాబాద్ మున్సిపల్ కార్పొరేషన్ చట్టం స్థానంలో మూడు కార్పొరేషన్లకు సమానంగా వర్తించేలా “కోర్ అర్బన్ చట్టం”ను తయారు చేయాలని సూచించారు.హైదరాబాద్, సైబరాబాద్, మల్కాజిగిరి కార్పొరేషన్ల పరిధిలో అభివృద్ధి పనులు, పన్నుల వసూళ్లు, అనుమతులు, ఇతర పరిపాలనా కార్యక్రమాలకు ఈ కొత్త చట్టం ఆధారంగా వ్యవహరించాల్సి ఉంటుందని పేర్కొన్నారు. మున్సిపల్ పట్టణాభివృద్ధి శాఖ నిర్వహించిన సమీక్ష సమావేశంలో ఈ నిర్ణయం తీసుకున్నట్లు అధికారులు తెలిపారు.కోర్ అర్బన్ ప్రాంత ఆర్థిక వ్యవస్థ బలోపేతానికి ప్రత్యేక చర్యలు చేపట్టాలని, ముఖ్యంగా పరిశుభ్రతకు అత్యంత ప్రాధాన్యం ఇవ్వాలని ముఖ్యమంత్రి ఆదేశించారు. నగరాల్లో వీధిదీపాల వ్యవస్థను సమగ్ర పర్యవేక్షణ వ్యవస్థతో అనుసంధానం చేయాలని సూచించారు. వీధిదీపాల పనితీరును ఎప్పటికప్పుడు గమనించే విధంగా కేంద్ర నియంత్రణ వ్యవస్థ ఏర్పాటు చేయాలని తెలిపారు.పట్టణ పరిపాలనలో పారదర్శకత, వేగం, సమన్వయం పెంచడమే కోర్ అర్బన్ చట్టం లక్ష్యమని అధికారులు వెల్లడించారు. త్వరలోనే చట్ట ముసాయిదాను సిద్ధం చేసి మంత్రివర్గ ఆమోదానికి తీసుకురానున్నట్లు సమాచారం.