ప్రతి పాఠశాలలో గ్రంథాలయం.. గ్రంథపాలకుడు తప్పనిసరి

లైబ్రరీలకు జీవం పోయాలి.. ప్రభుత్వానికి ఎల్‌ఐఎస్ అభ్యర్థుల విజ్ఞప్తి

హైదరాబాద్, జూలై 18: రాష్ట్రంలోని అన్ని విద్యాసంస్థలు, పౌర గ్రంథాలయాలు, వివిధ ప్రభుత్వ శాఖల్లో ఖాళీగా ఉన్న గ్రంథపాలక (లైబ్రేరియన్) పోస్టులను తక్షణమే భర్తీ చేయాలని లైబ్రరీ అండ్ ఇన్ఫర్మేషన్ సైన్స్ (ఎల్‌ఐఎస్) పూర్తి చేసిన నిరుద్యోగ అభ్యర్థులు ప్రభుత్వాన్ని డిమాండ్ చేశారు. హైదరాబాద్‌లోని సరూర్‌నగర్‌లో బీఆర్‌ఎస్ పార్టీ ఆధ్వర్యంలో నిర్వహించిన యువ సంగ్రామ సదస్సులో పెద్ద సంఖ్యలో పాల్గొన్న వారు తమ సమస్యలను ప్రభుత్వ దృష్టికి తీసుకెళ్లారు.

రాష్ట్రంలో పౌర గ్రంథాలయాలు, వివిధ ప్రభుత్వ శాఖలు, రాబోయే డీఎస్సీ నియామకాలలో లైబ్రేరియన్ పోస్టులను చేర్చి నియామకాలు చేపట్టాలని కోరారు. ప్రస్తుతం వివిధ శాఖల్లో ఖాళీగా ఉన్న సుమారు 8 వేల లైబ్రేరియన్ పోస్టులను వెంటనే భర్తీ చేయాలని విజ్ఞప్తి చేశారు.

వైద్య కళాశాలలు, పౌర గ్రంథాలయాల్లో 90 శాతం ప్రత్యక్ష నియామకాలు, 10 శాతం పదోన్నతులు అమలు చేయాలని, రాష్ట్రంలోని అన్ని ప్రభుత్వ, ప్రైవేట్ పాఠశాలల్లో తప్పనిసరిగా లైబ్రేరియన్ పోస్టులు ఏర్పాటు చేస్తూ ప్రత్యేక ప్రభుత్వ ఉత్తర్వు జారీ చేయాలని డిమాండ్ చేశారు.

**జాతీయ విద్యా విధానం–2020 (NEP–2020)**తో పాటు గత విద్యా విధానాలు కూడా ప్రతి విద్యాసంస్థలో గ్రంథాలయం, అర్హత కలిగిన గ్రంథపాలకుడు ఉండాలని స్పష్టం చేస్తున్నాయని గుర్తు చేశారు. తెలంగాణ ఎడ్యుకేషన్ కమిషన్–2026 సిఫార్సులను అమలు చేసి అన్ని విద్యాసంస్థల్లో గ్రంథాలయాలు ఏర్పాటు చేసి లైబ్రేరియన్లను నియమించాలని కోరారు.

అలాగే వైద్య, న్యాయ, ఫార్మసీ, ఐటీఐ, బి.ఎడ్., ప్రత్యేక విద్య, ఇంటర్మీడియట్, డిగ్రీ కళాశాలల్లో కూడా లైబ్రేరియన్ పోస్టులను మంజూరు చేసి నియామకాలు చేపట్టాలని విజ్ఞప్తి చేశారు. దీంతో వేలాది మంది నిరుద్యోగ యువతకు ఉపాధి లభించడంతో పాటు విద్యార్థులకు నాణ్యమైన గ్రంథాలయ సేవలు అందుబాటులోకి వస్తాయని పేర్కొన్నారు.

ఈ కార్యక్రమంలో ఎ. శైలూ, ఎం. మంజుల, కె. సుమన్, సాయి చరణ్, బి. రఘువరన్, మాలతి, రాధాకృష్ణతో పాటు పలువురు నిరుద్యోగ లైబ్రేరియన్ అభ్యర్థులు పాల్గొన్నారు