న్యూఢిల్లీ, జూలై 15:

తెలంగాణ రాష్ట్రంలో 2026 అక్టోబర్ 1ను అర్హత తేదీగా తీసుకుని చేపట్టనున్న ప్రత్యేక సమగ్ర ఓటరు జాబితా సవరణ (Special Intensive Revision - SIR) కార్యక్రమానికి సంబంధించి భారత ఎన్నికల సంఘం సవరించిన షెడ్యూల్‌ను విడుదల చేసింది.

తెలంగాణ ప్రధాన ఎన్నికల అధికారి (CEO)కు ఎన్నికల సంఘం అండర్ సెక్రటరీ సందీప్ కుమార్ బుధవారం లేఖ పంపించారు. రాష్ట్ర ఎన్నికల అధికారుల అభ్యర్థన మేరకు సవరణ కార్యక్రమ షెడ్యూల్‌లో మార్పులు చేసినట్లు పేర్కొన్నారు.

సవరించిన షెడ్యూల్ ఇలా...

బీఎల్‌వోల ఇంటింటి సర్వే: జూన్ 25, 2026 నుంచి ఆగస్టు 3, 2026 వరకు

పోలింగ్ కేంద్రాల హేతుబద్ధీకరణ/పునర్వ్యవస్థీకరణ: ఆగస్టు 3, 2026

డ్రాఫ్ట్ ఓటరు జాబితా ప్రచురణ: ఆగస్టు 10, 2026 (సోమవారం)

క్లెయిమ్‌లు, అభ్యంతరాల స్వీకరణ: ఆగస్టు 10 నుంచి సెప్టెంబర్ 9, 2026 వరకు

క్లెయిమ్‌లు, అభ్యంతరాల పరిష్కారం: ఆగస్టు 10 నుంచి అక్టోబర్ 8, 2026 వరకు

తుది ఓటరు జాబితా ప్రచురణ: అక్టోబర్ 12, 2026 (సోమవారం)

ఎన్నికల సంఘం నిర్ణయాన్ని సంబంధిత అధికారులకు వెంటనే తెలియజేయాలని, సవరించిన షెడ్యూల్‌కు విస్తృత ప్రచారం కల్పించాలని ఆదేశించింది. అలాగే రాజకీయ పార్టీలకు కూడా ఈ మార్పులను లిఖితపూర్వకంగా తెలియజేయాలని సూచించింది.