తెలంగాణ ప్రభుత్వం బీసీ మహిళలకు స్వయం ఉపాధి కల్పించే లక్ష్యంతో అమలు చేస్తున్న ‘ఇంటింటికీ ఇందిరమ్మ కుట్టు మెషీన్’ పథకం దరఖాస్తు గడువును సెప్టెంబర్ 30వ తేదీ వరకు పొడిగించింది. ఇప్పటివరకు దరఖాస్తు చేసుకోని అర్హులైన బీసీ మహిళలు ఈ అవకాశాన్ని సద్వినియోగం చేసుకోవాలని మంత్రి పొన్నం ప్రభాకర్ సూచించారు. రాష్ట్రంలోని 119 నియోజకవర్గాల్లో ఒక్కో నియోజకవర్గానికి 1,000 మంది చొప్పున మొత్తం 1.19 లక్షల మంది మహిళలకు ఆటోమేటిక్ కుట్టు మెషీన్లను 100 శాతం ప్రభుత్వ సబ్సిడీపై అందించనున్నట్లు తెలిపారు. కుట్టు పనిపై ఆసక్తి ఉన్న మహిళలు ఈ పథకం ద్వారా స్వయం ఉపాధి పొందుతూ కుటుంబానికి ఆర్థికంగా అండగా నిలిచే అవకాశం ఉంటుందని పేర్కొన్నారు. అర్హులైన బీసీ మహిళలు గడువు ముగిసేలోగా టీజీఓబీఎంఎంఎస్ పోర్టల్‌లో దరఖాస్తు చేసుకోవాలని అధికారులు సూచించారు.