రైతుకు లాభం.. హెచ్‌డీపీఎస్‌తోనే సాధ్యం.

హైదరాబాద్‌, అక్టోబర్‌ 6 స్థానికం ప్రతినిధి:

పత్తి రైతుల ప్రయోజనాల కోసం హైడెన్సిటీ ప్లాంటింగ్‌ సిస్టమ్‌ (హెచ్‌డీపీఎస్‌)ను తెలంగాణలో విస్తృతంగా అమలు చేయాలని తెలంగాణ ప్రభుత్వ వ్యవసాయ ఉత్పత్తుల విభాగం కమిషనర్‌, వ్యవసాయ, సహకార శాఖ కార్యదర్శి కె. సురేంద్ర మోహన్‌ అన్నారు. హైదరాబాద్‌లో నిర్వహించిన ‘సంస్కరణల ఉత్సవం–2026’లో ఆయన ముఖ్య అతిథిగా పాల్గొని మాట్లాడారు.

హెచ్‌డీపీఎస్‌తో సంప్రదాయ సాగుతో పోలిస్తే దిగుబడులు పెరగడంతోపాటు కూలీల కొరతను అధిగమించవచ్చని తెలిపారు. యాంత్రీకరణకు అనుకూలంగా ఉండటంతోపాటు కలుపు నివారణ, పెట్టుబడి వ్యయాల తగ్గింపునకు ఈ విధానం దోహదపడుతుందన్నారు. రైతులు ఈ ఆధునిక సాగు విధానాన్ని అవలంబించేలా ప్రభుత్వ విభాగాలు, వ్యవసాయ సంస్థలు, పరిశ్రమలు సమన్వయంతో పనిచేయాలని సూచించారు.పత్తి, జౌళి రంగాల అభివృద్ధికి రైతులు, పరిశ్రమలు, ప్రభుత్వ సంస్థలను ఒకే వేదికపైకి తీసుకురావడం అభినందనీయమన్నారు. డిజిటల్‌ మార్పులు, ఉత్పాదకత పెంపు, కనీస మద్దతు ధరకు కొనుగోళ్లు, నాణ్యత మెరుగుదల, వ్యాపార నిర్వహణ సౌలభ్యంపై చర్చలు ఉపయోగకరంగా ఉంటాయని పేర్కొన్నారు.కార్యక్రమంలో సీసీఐ సీఎండీ లలిత్‌ కుమార్‌ గుప్తా, సహకార శాఖ ప్రత్యేక కమిషనర్‌ రాహుల్‌ రాజ్‌ పి.ఎస్‌, వ్యవసాయ విశ్వవిద్యాలయ పరిశోధన విభాగం సంచాలకుడు డాక్టర్‌ ఎం.బలరాం, పత్తి రైతులు, పరిశ్రమల ప్రతినిధులు పాల్గొన్నారు.