భువనగిరి పట్టణ కేంద్రంలోని కాంగ్రెస్ పార్టీ సీనియర్ నేత, మునుగోడు ఎమ్మెల్యే,మాజీ ఎంపీ కోమటిరెడ్డి రాజగోపాల్ రెడ్డి జన్మదినోత్సవాన్ని పురస్కరించుకుని బోనగిరి పట్టణంలో కాంగ్రెస్ సేవాదళ్ ఆధ్వర్యంలో పలు సేవా కార్యక్రమాలు ఘనంగా నిర్వహించారు. ఈ సందర్భంగా పచ్చలకట్ట సోమేశ్వర స్వామి దేవాలయం, శివాలయంలో ప్రత్యేక పూజలు,అభిషేకాలు నిర్వహించారు. అర్చకులు నాగరాజు పంతులు ఆధ్వర్యంలో స్వామివారికి ప్రత్యేక పూజలు జరిపి రాజగోపాల్ రెడ్డి ఆయురారోగ్యాలు, రాజకీయ ప్రగతి కోసం ప్రార్థనలు చేశారు. అనంతరం వృద్ధులు, వికలాంగులకు బట్టలు పంపిణీ చేయడంతో పాటు పండ్లు అందజేసి సేవా కార్యక్రమాలు చేపట్టారు. ఈ సందర్భంగా కాంగ్రెస్ సేవాదళ్ రాష్ట్ర కార్యదర్శి పిట్టల బాలరాజు మాట్లాడుతూ, రాజగోపాల్ రెడ్డి ప్రజల కోసం నిరంతరం సేవలందిస్తున్న ప్రజానాయకుడని కొనియాడారు. పేద విద్యార్థులకు, ఆపదలో ఉన్న వారికి అండగా నిలుస్తూ అనేక మందికి సహాయం చేసిన నాయకుడిగా ఆయన గుర్తింపు పొందారని తెలిపారు.యాదగిరిగుట్ట శ్రీ లక్ష్మీనరసింహస్వామి, ఎల్లమ్మ తల్లి, శ్రీ వెంకటేశ్వర స్వామి ఆశీస్సులతో రాజగోపాల్ రెడ్డి మరింత ఉన్నత స్థాయికి చేరుకుని, రాబోయే రోజుల్లో మంత్రి పదవి చేపట్టాలని మనస్ఫూర్తిగా కోరుకుంటున్నామని పేర్కొన్నారు. ఈ కార్యక్రమంలో జిల్లా సేవాదళ్ జనరల్ సెక్రటరీ గుమ్మడిల్లి రమేష్, జిల్లా ఉపాధ్యక్షుడు వాజిద్ భాయ్,బోనగిరి సేవాదళ్ పట్టణ అధ్యక్షుడు సోమ రవీందర్ రెడ్డి, దరిపెల్లి ప్రవీణ్,డాకూరి ప్రకాష్,రవీందర్,శ్రీనివాస్,నాగరాజ్ తదితరులు పాల్గొన్నారు.