యాదాద్రి భువనగిరి జిల్లాలో జరుగుతున్న రెండో సాధారణ మున్సిపల్ ఎన్నికల పోలింగ్‌ను పారదర్శకంగా, ప్రశాంతంగా నిర్వహించేందుకు ఏర్పాటు చేసిన వెబ్‌కాస్టింగ్ వ్యవస్థను జిల్లా ఎన్నికల అధికారి, కలెక్టర్ హనుమంతరావు కలెక్టరేట్‌లో బుధవారం ప్రత్యక్షంగా పరిశీలించారు.జిల్లాలోని ఆరు మున్సిపాలిటీల పరిధిలో ఉన్న అన్ని పోలింగ్ కేంద్రాల నుంచి ప్రత్యక్ష ప్రసారం అవుతున్న దృశ్యాలను కమాండ్ కంట్రోల్ సెంటర్ ద్వారా మానిటర్ చేస్తూ పోలింగ్ సరళిని సమీక్షించారు. ఓటర్ల రద్దీ, భద్రతా ఏర్పాట్లు, సిబ్బంది పనితీరుపై అధికారులతో చర్చించి అవసరమైన సూచనలు ఇచ్చారు.ఎన్నికలు ఎటువంటి అంతరాయాలు లేకుండా సజావుగా సాగాలని, ప్రతి కేంద్రంలో ఎన్నికల నిబంధనలు కచ్చితంగా అమలు కావాలని ఆదేశించారు. పారదర్శకత, సమగ్రతకు వెబ్‌కాస్టింగ్ కీలకమని పేర్కొన్నారు.

ఈ కార్యక్రమంలో జిల్లా రెవెన్యూ అధికారి జయమ్మ, ఎన్నికల సిబ్బంది తదితరులు పాల్గొన్నారు.