నారాయణఖేడ్ స్థానిక ప్రతినిధి కృష్ణ :మహిళల అభివృద్ధి, సాధికారత లక్ష్యంగా దేశవ్యాప్తంగా అమలు అవుతున్న మహిళా స్నేహపూర్వక మోడల్ గ్రామపంచాయతీ భావనకు మరింత బలం చేకూర్చే దిశగా మహారాష్ట్ర రాష్ట్రం పూణే నగరంలో జాతీయ స్థాయి వర్క్‌షాప్ కార్యక్రమం ఘనంగా నిర్వహించబడింది. ఈ వర్క్‌షాప్‌లో వివిధ రాష్ట్రాల నుంచి ఎంపికైన గ్రామపంచాయతీల ప్రతినిధులు,సర్పంచ్‌లు, అధికారులు పాల్గొని తమ అనుభవాలు, విజయ కథలను పరస్పరం పంచుకున్నారు.ఈ ప్రతిష్టాత్మక జాతీయ వర్క్‌షాప్‌లో మన ప్రాంతానికి చెందిన బాదల్గాం గ్రామపంచాయతీ సర్పంచ్ మమత నర్సింహులు పాల్గొనడం విశేషంగా నిలిచింది.మహిళల సంక్షేమం, భద్రత,ఆరోగ్యం,విద్య,ఉపాధి అవకాశాల కల్పన వంటి అంశాలపై బాదల్గాం గ్రామపంచాయతీ అమలు చేస్తున్న వినూత్న కార్యక్రమాలను ఈ సందర్భంగా సర్పంచ్ మమత నర్సింహులు వివరించారు. గ్రామ స్థాయిలో మహిళల భాగస్వామ్యంతో చేపడుతున్న అభివృద్ధి కార్యక్రమాలు జాతీయ స్థాయిలో ప్రశంసలు పొందడం గ్రామానికి గర్వకారణంగా మారింది.ఈ వర్క్‌షాప్‌లో మహిళా స్నేహపూర్వక గ్రామపంచాయతీగా ఎలా రూపుదిద్దుకోవాలి, మహిళలకు అనుకూలమైన మౌలిక వసతులు,స్వయం సహాయక సంఘాల బలోపేతం,బాలికల విద్యా ప్రోత్సాహం, మహిళలపై హింస నివారణ చర్యలు వంటి అంశాలపై నిపుణులు విస్తృతంగా అవగాహన కల్పించారు.అలాగే ఇతర రాష్ట్రాల గ్రామపంచాయతీల అనుభవాలను తెలుసుకునే అవకాశం లభించడం ద్వారా బాదల్గాం గ్రామంలో మరింత అభివృద్ధి కార్యక్రమాలు చేపట్టేందుకు ప్రేరణ లభించిందని సర్పంచ్ మమత నర్సింహులు తెలిపారు.ఈ జాతీయ వర్క్‌షాప్‌లో పాల్గొనడం ద్వారా బాదల్గాం గ్రామపంచాయతీ కు ప్రత్యేక గుర్తింపు లభించడంతో పాటు, మహిళా సాధికారత దిశగా గ్రామం ముందడుగు వేస్తోందని స్థానికులు హర్షం వ్యక్తం చేస్తున్నారు.భవిష్యత్తులో మహిళలకు మరింత సురక్షితమైన, సమాన అవకాశాలు కలిగిన గ్రామంగా బాదల్గాం అభివృద్ధి చెందేందుకు ఈ వర్క్‌షాప్ దోహదపడుతుందని గ్రామ ప్రజలు ఆశాభావం వ్యక్తం చేస్తున్నారు.