నల్గొండలో ‘వేణు విద్య’ ఆసుపత్రి నిర్లక్ష్యం.!

ప్రాణాలతో చెలగాటమాడుతున్నారంటూ బంధువుల ఆందోళన..

ప్రభుత్వ వైద్యురాలి ప్రైవేటు ‘దోపిడీ’పై ప్రజల ఆగ్రహం..

​నల్గొండ : జిల్లా కేంద్రంలోని ఓ కార్పొరేట్ ఆసుపత్రిలో దారుణమైన వైద్య నిర్లక్ష్యం వెలుగుచూసింది. చికిత్స కోసం వచ్చిన ఆరు నెలల గర్భిణికి ఏకంగా గర్భనిరోధక మాత్రలు రాసి ఇచ్చిన ఘటన స్థానికంగా కలకలం రేపింది. పట్టణంలోని వేణు విద్య హాస్పిటల్‌లో చోటుచేసుకున్న ఈ ఉదంతంపై బాధితురాలి కుటుంబ సభ్యులు ఆసుపత్రి ఎదుట పెద్ద ఎత్తున ఆందోళనకు దిగారు. బాధితుల కథనం ప్రకారం.. గిరకబాయి గూడెం కి చెందిన ఒక మహిళ గర్భం దాల్చినప్పటి నుంచి వేణు విద్య ఆసుపత్రిలోనే వైద్య సేవలు పొందుతున్నారు. ప్రస్తుతం ఆమె ఆరో నెలలో ఉండగా, సాధారణ చెకప్ కోసం రాగా గైనకాలజిస్ట్ డాక్టర్ విద్యా భార్గవి మందులు రాసిచ్చారు. అయితే ఆ ప్రిస్క్రిప్షన్‌ను అనుమానంతో ఇతర వైద్యులకు చూపించగా అవి గర్భనిరోధక మాత్రలని తేలింది. ఈ మందులు వాడితే తల్లి, బిడ్డ ఇద్దరికీ ప్రాణాపాయం ఉంటుందని ఇతర వైద్యులు హెచ్చరించడంతో బాధితులు దిగ్భ్రాంతికి గురయ్యారు.

​పొరపాటు అంటూ బుకాయింపు..

​తమకు జరిగిన అన్యాయంపై బాధితులు ఆసుపత్రి యాజమాన్యాన్ని నిలదీయగా.. మనుషులన్నాక పొరపాట్లు జరగడం సహజమని ఆ మాత్రలు వేసుకున్నా ఏమీ కాదు అంటూ డాక్టర్లు నిర్లక్ష్యంగా సమాధానం చెప్పడం గమనార్హం. ప్రొఫెసర్ హోదాలో ఉండి, ప్రాణాలను కాపాడాల్సిన వైద్యులే ఇలా బాధ్యతారాహిత్యంగా వ్యవహరించడంపై కుటుంబ సభ్యులు మండిపడుతున్నారు. తమ బిడ్డకు ఏమైనా జరిగితే ఎవరు బాధ్యత వహిస్తారని వారు ఆవేదన వ్యక్తం చేశారు. కేవలం డబ్బు సంపాదనే ధ్యేయంగా కార్పొరేట్ ఆసుపత్రులు ప్రజల ప్రాణాలతో చెలగాటమాడుతున్నాయని బాధితులు ఆరోపించారు.

​సర్కారీ విధులు ప్రైవేటు ‘మెయింటెనెన్స్’

​ఈ వివాదంలో మరో కీలక అంశం చర్చనీయాంశమైంది. డాక్టర్ విద్యా భార్గవి ఒకవైపు ప్రభుత్వ ఆసుపత్రిలో గైనకాలజిస్ట్‌గా విధులు నిర్వహిస్తూనే, మరోవైపు నిబంధనలకు విరుద్ధంగా ప్రైవేటు ఆసుపత్రిని నడుపుతున్నారని బాధితులు ఆరోపిస్తున్నారు. ప్రభుత్వ ఆసుపత్రులను నిర్వీర్యం చేస్తూ ప్రైవేటు క్లినిక్‌ల ద్వారా సామాన్యులను దోచుకుంటున్నారని విమర్శలు వెల్లువెత్తుతున్నాయి. ఇలాంటి నిర్లక్ష్యపూరిత వైద్యం అందిస్తున్న ఆసుపత్రిని వెంటనే సీజ్ చేయాలని, బాధ్యులైన డాక్టర్లపై కఠిన చర్యలు తీసుకోవాలని ఉన్నతాధికారులను వారు వేడుకుంటున్నారు.