రామన్నపేట: పట్టణంలోని ప్రసిద్ధ శ్రీ చెన్నకేశవస్వామి ఆలయంలో జూలై 4 నుంచి నిర్వహించనున్న బ్రహ్మోత్సవాల కరపత్రాన్ని గురువారం గ్రామ సర్పంచ్ గరిక సత్యనారాయణ, ఉపసర్పంచ్ మోటె రమేష్ ఆవిష్కరించారు.

ఈ సందర్భంగా ఆలయ కమిటీ చైర్మన్ లవణం ఉపేందర్ మాట్లాడుతూ.. జూలై 4న అంకురార్పణ, ప్రత్యేక పూజలు, ధ్వజారోహణ, హోమంతో బ్రహ్మోత్సవాలు ప్రారంభమవుతాయని తెలిపారు. జూలై 5న ఉదయం 11.15 గంటలకు స్వామివారి కల్యాణ మహోత్సవం, అనంతరం అన్నప్రసాద వితరణ నిర్వహిస్తామని చెప్పారు. జూలై 6న తెల్లవారుజామున స్వామివారి రథోత్సవం వైభవంగా జరగనున్నట్లు వెల్లడించారు.

బ్రహ్మోత్సవాల్లో రామన్నపేట మండల, పట్టణ ప్రజలు పెద్ద సంఖ్యలో పాల్గొని స్వామివారి ఆశీస్సులు పొందాలని ఆయన కోరారు.

కార్యక్రమంలో సాల్వేర్ అశోక్, జెల్ల వెంకటేష్, గోదాసు సుగ్రీవులు, ఊట్కూరు నరసింహ, వనం అంజయ్య, కోట సుధాకర్, పూజారి శ్రీనివాస్ ఆచార్యులు, భూసాని యాదగిరి, రాధాకిషన్, వార్డు సభ్యుడు సుర్వి హరిబాబు, ఊట్కూరు శ్రీను, ఆలయ కమిటీ సభ్యులు, భక్తులు పాల్గొన్నారు.