కూసుమంచి మండలం గన్యాతండాలో ఈ నెల 27 నుంచి 29 వరకు నిర్వహించనున్న శ్రీ సంత్ సేవాలాల్ మహారాజ్ విగ్రహ ప్రతిష్ఠాపన మహోత్సవానికి సర్వం సిద్ధమవుతోంది. ఈ ఉత్సవాల గోడపత్రికలు, ప్రచార రథాన్ని ఆదివారం తండావాసులు ఘనంగా ప్రారంభించారు.

ఈ సందర్భంగా నిర్వాహకులు మాట్లాడుతూ.. బంజారాల ఆరాధ్య దైవం శ్రీ సంత్ సేవాలాల్ మహారాజ్ బోధనలు, ఆయన విశిష్టతను చాటిచెప్పేలా మూడు రోజుల పాటు ఈ మహోత్సవాలను నిర్వహిస్తున్నట్లు తెలిపారు. గ్రామంలో ఇప్పటికే వేడుకల సందడి నెలకొంది. భక్తుల సౌకర్యార్థం ప్రత్యేక ఏర్పాట్లు చేస్తున్నారు.

విగ్రహ ప్రతిష్ఠాపనతో పాటు పూజా కార్యక్రమాలు, భజనలు, సాంస్కృతిక కార్యక్రమాలు నిర్వహించనున్నట్లు తెలిపారు. పరిసర గ్రామాల నుంచి భారీగా భక్తులు తరలివచ్చే అవకాశముందని నిర్వాహకులు పేర్కొన్నారు.