మార్చి 24 వరకు దరఖాస్తులకు గడువు

రామన్నపేట, మార్చి 20: మండలంలోని షెడ్యూల్డ్ కులాలకు చెందిన నిరుద్యోగ యువత, యువకులు మరియు రైతులకు 2025-26 ఆర్థిక సంవత్సరానికి సంబంధించిన ఎస్సీ యాక్షన్ ప్లాన్ పథకాల కింద దరఖాస్తులు ఆహ్వానిస్తున్నట్లు మండల పరిషత్ అభివృద్ధి అధికారి తెలిపారు.

ఈ పథకాలలో భాగంగా విద్యుత్ ద్విచక్ర వాహనాలు (EV Two Wheelers), విద్యుత్ మూడు చక్రాల వాహనాలు (EV Three Wheelers), సోలార్ యూనివర్సల్ పంప్ కంట్రోల్ యూనిట్లు మరియు వ్యవసాయ సంబంధిత పరికరాల కోసం అర్హులైన అభ్యర్థులు www.tobmms.cgg.gov.in⁠� వెబ్‌సైట్‌లో మార్చి 20 నుండి మార్చి 24 వరకు ఆన్‌లైన్‌లో దరఖాస్తు చేసుకోవాలి.

ఆన్‌లైన్‌లో దరఖాస్తు చేసిన తరువాత సంబంధిత పత్రాలను జతచేసి దరఖాస్తు ఫారమ్‌ను ఎంపీడీఓ కార్యాలయంలో సమర్పించాల్సి ఉంటుంది.

అర్హతలు:

కుటుంబ వార్షిక ఆదాయం రూ.1,50,000 లోపు ఉండాలి

రవాణా పథకాల కోసం 01-07-2025 నాటికి 21 నుండి 50 సంవత్సరాల మధ్య వయస్సు ఉండాలి

వ్యవసాయ పథకాల కోసం 21 నుండి 60 సంవత్సరాల మధ్య వయస్సు ఉండాలి

సోలార్ పంప్ పథకానికి కనీసం 2 ఎకరాల భూమి, బోరు బావిలో నీటి సౌకర్యం ఉండాలి

జత చేయాల్సిన పత్రాలు: ఆధార్ కార్డు, రేషన్ కార్డు, ఆదాయ ధృవీకరణ పత్రం, కుల ధృవీకరణ పత్రం, డ్రైవింగ్ లైసెన్స్, బోరు బావి నీటి ధృవీకరణ పత్రం, పట్టాదారు పాస్‌బుక్, సదరం సర్టిఫికేట్ (దివ్యాంగులకు), పాస్‌పోర్ట్ సైజ్ ఫోటో.

అర్హులైన వారు ఈ అవకాశాన్ని వినియోగించుకోవాలని అధికారులు సూచించారు.