సూపర్ ఎల్‌నినో పరిస్థితులపై జిల్లా కలెక్టర్లతో వీడియో కాన్ఫరెన్స్

సూపర్ ఎల్‌నినో ప్రభావంతో రాష్ట్రంలో వర్షాభావ పరిస్థితులు ఏర్పడే అవకాశాల నేపథ్యంలో శనివారం రాష్ట్ర ప్రధాన కార్యదర్శి సంజయ్ జాజు హైదరాబాద్ నుంచి జిల్లా కలెక్టర్లతో వీడియో కాన్ఫరెన్స్ నిర్వహించారు. సూర్యాపేట సమీకృత జిల్లా కలెక్టరేట్ (ఐడీఓసీ) నుంచి జిల్లా కలెక్టర్ తేజస్ నంద్ లాల్ పవార్ సమావేశంలో పాల్గొన్నారు.

ఈ సందర్భంగా రాష్ట్ర ప్రధాన కార్యదర్శి సంజయ్ జాజు మాట్లాడుతూ ఎల్‌నినో ప్రభావంతో సాధారణం కంటే తక్కువ వర్షపాతం నమోదయ్యే అవకాశం ఉన్నందున అన్ని శాఖల అధికారులు ముందస్తు కార్యాచరణతో సిద్ధంగా ఉండాలని సూచించారు. జిల్లాల వారీగా సూపర్ ఎల్‌నినో కార్యాచరణ ప్రణాళికలు రూపొందించి అమలు చేయాలని, రైతులకు ప్రత్యామ్నాయ పంటల సాగుపై విస్తృతంగా అవగాహన కల్పించాలని ఆదేశించారు.

తక్కువ నీటి అవసరమయ్యే పంటలను ప్రోత్సహించడంతో పాటు రైతులకు అవసరమైన విత్తనాలు, సాంకేతిక సూచనలు అందుబాటులో ఉంచాలని సూచించారు. వర్షపాతం పరిస్థితులు, తాగునీటి లభ్యత, వ్యవసాయ ప్రణాళికలు, శాఖల వారీ కార్యాచరణపై సమగ్ర సమాచారంతో సిద్ధంగా ఉండాలని అధికారులను ఆదేశించారు.

జిల్లా ఇన్‌చార్జి మంత్రులు, ప్రత్యేక అధికారులతో నిర్వహించే సమీక్ష సమావేశాలకు అన్ని శాఖల అధికారులు పూర్తి వివరాలతో హాజరుకావాలని, అడిగే ప్రతి అంశంపై పీపీటీ, ప్రింట్ కాపీలు, పెన్‌డ్రైవ్, మొబైల్‌లో సమాచారం అందుబాటులో ఉంచుకోవాలని సూచించారు.

వీడియో కాన్ఫరెన్స్ అనంతరం జిల్లా కలెక్టర్ తేజస్ నంద్ లాల్ పవార్ మాట్లాడుతూ జూలై 20న ఉమ్మడి నల్గొండ జిల్లాలో జిల్లా ఇన్‌చార్జి మంత్రి అడ్లూరి లక్ష్మణ్ కుమార్ నిర్వహించే సమీక్ష సమావేశానికి సంబంధిత అధికారులు తమ శాఖలకు సంబంధించిన పూర్తి సమాచారంతో హాజరుకావాలని ఆదేశించారు.

సమావేశంలో అదనపు కలెక్టర్ బి. హరి సింగ్, జడ్పీ సీఈఓ శిరీష, డీఆర్‌డీఓ సన్యాసయ్య, డీపీఓ యాదగిరి, డీఎంహెచ్‌వో వెంకటరమణ, డీఏఓ శ్రీధర్ రెడ్డి, సీపీఓ కిషన్, హార్టికల్చర్ అధికారి నాగయ్య, డీఈఓ అశోక్, మిషన్ భగీరథ ఈఈ అరుణాకర్ రెడ్డి, మున్సిపల్ కమిషనర్లు, ఇతర అధికారులు పాల్గొన్నారు.