1. మర్రిగూడ ఫ్లైఓవర్ పూర్తికి మంత్రి కోమటిరెడ్డి ప్రత్యేక చొరవే కారణమని స్పష్టం
2. భూసేకరణ, విద్యుత్ లైన్ సమస్యలు పరిష్కరించిన తర్వాతే పనులు వేగం పుంజుకున్నాయని వెల్లడి
3. చౌకబారు రాజకీయాలు చేస్తే ప్రజలే తగిన గుణపాఠం చెబుతారని హెచ్చరిక

మర్రిగూడ ఫ్లైఓవర్ అంశంపై మాజీ ఎమ్మెల్యే కంచర్ల భూపాల్‌రెడ్డి చేసిన వ్యాఖ్యలకు నల్లగొండ నగరపాలిక మేయర్ బుర్రి చైతన్య శ్రీనివాస్‌రెడ్డి ఘాటుగా స్పందించారు. ఫ్లైఓవర్‌ను అడ్డుపెట్టుకుని రాజకీయ డ్రామాలు చేయడం మానుకోవాలని ఆయన హెచ్చరించారు. నల్లగొండ అభివృద్ధిని చూసి ఓర్వలేక బీఆర్ఎస్ నాయకులు ప్రజలను తప్పుదోవ పట్టించే ప్రయత్నం చేస్తున్నారని విమర్శించారు.

మేయర్ మాట్లాడుతూ, మర్రిగూడ ఫ్లైఓవర్ పూర్తికి రాష్ట్ర రోడ్లు, భవనాల శాఖ మంత్రి కోమటిరెడ్డి వెంకటరెడ్డి ప్రత్యేక చొరవే ప్రధాన కారణమని స్పష్టం చేశారు. గతంలో బీఆర్ఎస్ ప్రభుత్వం ప్రాజెక్టుకు శంకుస్థాపన చేసినప్పటికీ, భూసేకరణ పూర్తి చేయకుండా ప్రజలకు తప్పుడు హామీలు ఇచ్చిందని ఆరోపించారు. అవసరమైన భూమిని సేకరించకుండానే పనులు ప్రారంభించినట్లు ప్రచారం చేసి ప్రజలను మభ్యపెట్టిందెవరో అందరికీ తెలుసని అన్నారు.

కాంగ్రెస్ ప్రభుత్వం అధికారంలోకి వచ్చిన తర్వాత ఫ్లైఓవర్ నిర్మాణంలో ఉన్న ప్రధాన అడ్డంకులను తొలగించిందని మేయర్ తెలిపారు. భూసేకరణ కోసం సుమారు రూ.8 కోట్ల నిధులువిడుదల చేసి ప్రక్రియను పూర్తి చేయడంతో పాటు, పనులు వేగంగా జరిగేలా చర్యలు తీసుకున్నట్లు వెల్లడించారు.

అంతేకాకుండా, ఫ్లైఓవర్ నిర్మాణానికి అడ్డుగా ఉన్న132 కేవీ విద్యుత్ లైన్ షిఫ్టింగ్‌కు గత ప్రభుత్వం ఎలాంటి నిధులు కేటాయించలేదని విమర్శించారు. మంత్రి కోమటిరెడ్డి వెంకటరెడ్డి ప్రత్యేక చొరవతో రూ.2.50 కోట్ల నిధులుమంజూరు చేయించి విద్యుత్ లైన్ మార్పిడి పనులను పూర్తి చేయడంతో నిర్మాణానికి మార్గం సుగమమైందని వివరించారు.

పదేళ్లు అధికారంలో ఉండి పూర్తి చేయలేని అభివృద్ధి పనులపై ఇప్పుడు బీఆర్ఎస్ నాయకులు మాట్లాడటం విడ్డూరంగా ఉందని మేయర్ వ్యాఖ్యానించారు. ప్రజలు ఇప్పటికే జరిగిన ఎన్నికల్లో మాజీ ఎమ్మెల్యేకు తగిన తీర్పు ఇచ్చారని, అయినా ఇప్పటికీ వాస్తవాలను అంగీకరించకుండా రాజకీయ విమర్శలు చేయడం బాధాకరమన్నారు.

వచ్చే ఎన్నికల్లో కూడా ప్రజలు అభివృద్ధికి ఓటు వేస్తారని, ప్రజల విశ్వాసం కోల్పోయిన నాయకులకు డిపాజిట్ కూడా దక్కని పరిస్థితి వస్తుందని రాజకీయ సవాల్ విసిరారు. నల్లగొండలో జరుగుతున్న అభివృద్ధి కార్యక్రమాలన్నీ మంత్రి కోమటిరెడ్డి వెంకటరెడ్డి నాయకత్వంలోనే వేగంగా ముందుకు సాగుతున్నాయని పేర్కొన్నారు.

ఫ్లైఓవర్ వంటి ప్రజలకు ఉపయోగపడే అభివృద్ధి పనులను రాజకీయాలకు వేదికగా మార్చకుండా, ప్రజా ప్రయోజనాలను దృష్టిలో ఉంచుకుని వ్యవహరించాలని మేయర్ సూచించారు. ఇకనైనా వాస్తవాలు తెలుసుకుని మాట్లాడాలని, అభివృద్ధిని అడ్డుకునే విధంగా చౌకబారు రాజకీయాలు చేస్తే ప్రజలే తగిన గుణపాఠం చెబుతారని హెచ్చరించారు. నల్లగొండ అభివృద్ధి కోసం కాంగ్రెస్ ప్రభుత్వం కట్టుబడి ఉందని, ప్రజలకు ఇచ్చిన ప్రతి హామీని అమలు చేస్తూ నగరాభివృద్ధిని మరింత వేగవంతం చేస్తామని మేయర్ బుర్రి చైతన్య శ్రీనివాస్‌రెడ్డి స్పష్టం చేశారు.