కొనుగోలు ప్రక్రియను వేగవంతం చేయాలి..

​అకాల వర్షాల నేపథ్యంలో కలెక్టర్లకు మంత్రుల ఆదేశం..

వీడియో కాన్ఫరెన్స్‌లో పాల్గొన్న కలెక్టర్ బి. చంద్రశేఖర్..

​నల్లగొండ : రానున్న మూడు, నాలుగు రోజుల్లో జిల్లాలో అకాల వర్షాలు కురిసే అవకాశం ఉన్నందున, కొనుగోలు కేంద్రాల్లోని ధాన్యం తడవకుండా ముందస్తు జాగ్రత్తలు తీసుకోవాలని జిల్లా కలెక్టర్ బి. చంద్రశేఖర్ అధికారులను ఆదేశించారు. ఆదివారం రాష్ట్రవ్యాప్తంగా కురిసిన వర్షాల నేపథ్యంలో, ధాన్యం సేకరణపై సోమవారం రాష్ట్ర పౌరసరఫరాల శాఖ మంత్రి ఎన్. ఉత్తమ్ కుమార్ రెడ్డి హైదరాబాద్ నుండి వీడియో కాన్ఫరెన్స్ నిర్వహించారు.

ఈ సమీక్షలో మంత్రులు పొన్నం ప్రభాకర్, వాకిటి శ్రీహరి, పొంగులేటి శ్రీనివాస్ రెడ్డి, శ్రీధర్ బాబు తదితరులు పాల్గొని కలెక్టర్లకు దిశానిర్దేశం చేశారు. వీడియో కాన్ఫరెన్స్‌లో మంత్రి ఉత్తమ్ కుమార్ రెడ్డి జిల్లా పరిస్థితిని అడగ్గా.. ఆదివారం సాయంత్రం నల్లగొండ, మిర్యాలగూడ, హాలియా ప్రాంతాల్లో ఈదురు గాలులతో కూడిన భారీ వర్షం కురిసిందని కలెక్టర్ వివరించారు. కల్లాలు, కొనుగోలు కేంద్రాల్లో రైతులు టార్పాలిన్లు కప్పుకున్నప్పటికీ గాలుల తీవ్రతకు అవి ఎగిరిపోయి కొంత ధాన్యం తడిసిందని ప్రస్తుతం ఆ ధాన్యం ఆరిపోయిందని కలెక్టర్ మంత్రికి వివరించారు.

​అప్రమత్తంగా ఉండాలి.. మంత్రుల సూచన

పౌరసరఫరాల శాఖ మంత్రి ఉత్తమ్ కుమార్ రెడ్డి మాట్లాడుతూ... మే నెల ధాన్యం సేకరణకు అత్యంత కీలకమని జిల్లా కలెక్టర్లు వాతావరణ శాఖ నివేదికలను ఎప్పటికప్పుడు గమనిస్తూ అప్రమత్తంగా ఉండాలని ఆదేశించారు. మంత్రి పొంగులేటి శ్రీనివాస్ రెడ్డి మాట్లాడుతూ.. ఈ ఏడాది దిగుబడి ఎక్కువగా ఉన్నందున గన్నీ బ్యాగులు రవాణా సమస్యలు లేకుండా చూడాలన్నారు. గ్రామ స్థాయిలో పంచాయతీ కార్యదర్శుల నుంచి పైస్థాయి అధికారుల వరకు అందరూ కొనుగోలు ప్రక్రియను పర్యవేక్షించాలని సూచించారు. వీడియో కాన్ఫరెన్స్ అనంతరం జిల్లా అధికారులతో కలెక్టర్ సమీక్ష నిర్వహించారు. కొనుగోలు కేంద్రాలు, మిల్లుల వద్ద ధాన్యం నిల్వలు తడవకుండా చూడాలని లారీల కొరత లేకుండా చర్యలు తీసుకోవాలని ఆదేశించారు. రైతులు ఇబ్బంది పడకుండా ధాన్యం సేకరణను వేగవంతం చేయాలన్నారు. ఈ కార్యక్రమంలో అదనపు కలెక్టర్ జె. శ్రీనివాస్, డి.ఆర్.డి.ఓ. శేఖర్ రెడ్డి, మార్కెటింగ్ ఏడీ ఛాయాదేవి, పౌరసరఫరాలు మరియు రవాణా శాఖ అధికారులు పాల్గొన్నారు.