దేవాలయాలకు సంబంధించిన భూములను కాపాడటం ప్రభుత్వ అధికారుల ముఖ్య బాధ్యత అని బీజేపీ అసెంబ్లీ కో-కన్వీనర్ నాగరాజు గౌడ్ స్పష్టం చేశారు. మంగళవారం దేవాదాయ శాఖ జిల్లా అసిస్టెంట్ కమిషనర్ సుధాకర్ రెడ్డి తో కలిసి పట్టణంలోని బైరాగి మఠానికి చెందిన భూములను ఆయన పరిశీలించారు.

ఈ సందర్భంగా నాగరాజు గౌడ్ మాట్లాడుతూ, బైరాగి మఠం భూములపై జరిగిన అక్రమ కబ్జాల విషయాన్ని గతంలో ముఖ్యమంత్రి చంద్రబాబు నాయుడు దృష్టికి తీసుకెళ్లినట్లు తెలిపారు. దీనిపై స్పందించిన సీఎం కార్యాలయం, సంబంధిత శాఖలు మరియు రెవెన్యూ అధికారులకు పూర్తి స్థాయి విచారణ జరిపి నివేదిక సమర్పించాలని ఆదేశాలు జారీ చేసినట్లు చెప్పారు.

బైరాగి మఠానికి చెందిన భూములను గతంలో కొందరు రాజకీయ ప్రభావాన్ని ఉపయోగించి అక్రమంగా తమ పేర్లపై నమోదు చేసుకుని విక్రయాలు జరిపినట్లు ఆయన ఆరోపించారు. దేవాలయ భూములను ఆక్రమించిన వారెవరు అయినా కఠిన చర్యలు తప్పవని హెచ్చరించారు.

ఈ కార్యక్రమంలో డివిజన్ ఎండోమెంట్ ఇన్‌స్పెక్టర్ వెంకటేశ్వర్లు, బీజేపీ యూత్ వింగ్ మండల అధ్యక్షుడు రవిశంకర్ శంకర్ తదితరులు పాల్గొన్నారు.