డ్రైవర్‌పై ఆకస్మిక దాడి.. పరిస్థితి విషమం

నల్లగొండ జిల్లా చిట్యాల జాతీయ రహదారిపై తీవ్ర ఉద్రిక్తత నెలకొంది. నల్లగొండ నుంచి హైదరాబాద్‌కు కారులో వెళ్తున్న ఇమ్రాన్ అనే డ్రైవర్‌పై గుర్తు తెలియని వ్యక్తి ఆకస్మికంగా కత్తితో దాడి చేశాడు.

నార్కెట్‌పల్లి వద్ద లిఫ్ట్ అడిగిన ఉత్తరప్రదేశ్, బీహార్ ప్రాంతాలకు చెందిన వ్యక్తిగా అనుమానిస్తున్న వ్యక్తిని ఇమ్రాన్ కారులో ఎక్కించుకున్నాడు. చిట్యాల సమీపానికి రాగానే ఆ వ్యక్తి డ్రైవర్‌పై అకస్మాత్తుగా కత్తితో దాడి చేసి, అతని వద్ద ఉన్న మొబైల్ ఫోన్‌ను లాక్కునేందుకు ప్రయత్నించాడు.

దీంతో డ్రైవర్ ప్రతిఘటించగా తీవ్ర గాయాలయ్యాయి. కత్తివేట్లతో రక్తస్రావం ఎక్కువగా కావడంతో ఇమ్రాన్ పరిస్థితి విషమంగా మారింది. ఘటనను గమనించిన స్థానికులు వెంటనే 108 అంబులెన్స్‌కు సమాచారం అందించారు. బాధితుడిని నల్లగొండ ప్రభుత్వ ఆసుపత్రికి తరలించి చికిత్స అందిస్తున్నారు.

సమాచారం అందుకున్న చిట్యాల పోలీసులు సంఘటనా స్థలానికి చేరుకుని కేసు నమోదు చేశారు. దుండగుడు పరారీలో ఉన్నట్లు పోలీసులు తెలిపారు. పరిసర ప్రాంతాల్లో గాలింపు చేపట్టినట్లు వెల్లడించారు.

ఈ ఘటనతో జాతీయ రహదారిపై ప్రయాణించే వాహనదారుల్లో భయాందోళనలు నెలకొన్నాయి. పూర్తి వివరాలు తెలియాల్సి ఉంది.