మైనర్ బాలురు తల్లిదండ్రులకు ఎస్ఐ వై. సైదులు కౌన్సిలింగ్..

​అభినవ్ స్టేడియం సమీపంలో పట్టుబడ్డ వైనం..

నిఘా ఉంచాలని తల్లిదండ్రులకు సూచన..

​నల్గొండ : మైనర్ బాలురు దురలవాట్లకు లోనై తమ బంగారు భవిష్యత్తును నాశనం చేసుకోవద్దని నల్గొండ టూ టౌన్ ఎస్ఐ వై. సైదులు హితవు పలికారు. పట్టణంలోని మేకల అభినవ్ స్టేడియం సమీపంలో కొంతమంది మైనర్లు సిగరెట్లు సేవిస్తూ చెడు మార్గంలో వెళ్తున్నారన్న సమాచారంతో పోలీసులు మెరుపు దాడులు నిర్వహించారు. ఈ సందర్భంగా పట్టుబడ్డ బాలురకు, వారి తల్లిదండ్రులకు స్టేషన్‌లో ప్రత్యేక కౌన్సిలింగ్ నిర్వహించారు. స్టేడియం పరిసరాల్లో మైనర్లు సిగరెట్లు సేవిస్తున్నారన్న స్థానికుల ఫిర్యాదుతో ఎస్ఐ ఆదేశాల మేరకు కానిస్టేబుళ్లు తనిఖీలు చేపట్టారు. అక్కడ అసభ్యకరంగా ప్రవర్తిస్తున్న బాలురను అదుపులోకి తీసుకుని పోలీస్ స్టేషన్‌కు తరలించారు. అనంతరం వారి తల్లిదండ్రులను పిలిపించి ఎస్ఐ సమక్షంలో కౌన్సిలింగ్ ఇచ్చారు.

భవిష్యత్తుపై అవగాహన..

​ఈ సందర్భంగా ఎస్ఐ సైదులు మాట్లాడుతూ.. చిన్న వయసులో సరదాగా మొదలయ్యే అలవాట్లు వ్యసనాలుగా మారి జీవితాలను చిన్నాభిన్నం చేస్తాయని ఆవేదన వ్యక్తం చేశారు. విద్యార్థి దశలో చదువుపై ఏకాగ్రత వహించి సమాజంలో ఉన్నత స్థానాలకు చేరుకోవాలి. స్నేహితుల ప్రభావంతో తప్పుడు మార్గంలో వెళ్తే జీవితాంతం పశ్చాత్తాపపడాల్సి వస్తుంది అని బాలురను హెచ్చరించారు. పిల్లల ప్రవర్తనపై తల్లిదండ్రులు నిరంతరం కన్నేసి ఉంచాలని ఎస్ఐ సూచించారు. వారు ఎక్కడికి వెళ్తున్నారు? ఎవరితో స్నేహం చేస్తున్నారు? అనే విషయాలను గమనించాలన్నారు. పిల్లలకు ఇచ్చే పాకెట్ మనీ విషయంలోనూ జాగ్రత్తగా ఉండాలని కోరారు. చిన్నపిల్లలకు సిగరెట్లు, ఇతర పొగాకు ఉత్పత్తులు విక్రయించే దుకాణదారులపై చట్టపరంగా కఠిన చర్యలు తీసుకుంటామని ఎస్ఐ స్పష్టం చేశారు. పట్టణంలో ఎక్కడైనా మైనర్లు చెడు అలవాట్లకు లోనవుతున్నట్లు కనిపిస్తే వెంటనే పోలీసులకు సమాచారం అందించాలని ఆయన ప్రజలను కోరారు. ఆరోగ్యకరమైన, నేరరహిత సమాజ స్థాపనే పోలీసుల లక్ష్యమని ఆయన పేర్కొన్నారు.