నల్గొండ,

మహిళలకు విద్యతో పాటు ఉపాధి అవకాశాలు కల్పించే దిశగా డా. బీఆర్ అంబేడ్కర్ ఓపెన్ యూనివర్సిటీ కృషి చేస్తోందని ఆ యూనివర్సిటీ జాయింట్ డైరెక్టర్ డా. బి. ధర్మానాయక్ తెలిపారు.

నల్గొండలోని ప్రభుత్వ మహిళా డిగ్రీ కళాశాలలో బీఆర్ అంబేడ్కర్ ఓపెన్ యూనివర్సిటీ స్టడీ సెంటర్ ఆధ్వర్యంలో మంగళవారం నిర్వహించిన సమావేశంలో ఆయన మాట్లాడారు. మహిళల సాధికారత కోసం తెలంగాణ ప్రభుత్వం వీహబ్, వ్యాపార నైపుణ్యాలను ప్రోత్సహించేందుకు ‘వీ-ఎనబుల్’ కార్యక్రమాన్ని అమలు చేస్తోందన్నారు.

టాటా కన్సల్టెన్సీ సర్వీసెస్, అనువాదిని సంస్థలతో భాషా అనువాద రంగంలో ఉపాధి అవకాశాల కోసం ఒప్పందాలు కుదుర్చుకున్నామని వివరించారు. నల్గొండ ప్రభుత్వ మహిళా డిగ్రీ కళాశాలలో మహిళల కోసం ప్రత్యేకంగా అంబేడ్కర్ ఓపెన్ యూనివర్సిటీ స్టడీ సెంటర్ ఏర్పాటు చేసినట్లు తెలిపారు.

ఈ కార్యక్రమంలో కళాశాల ప్రిన్సిపల్ ప్రొ. శ్రీనివాసరాజు, రీజినల్ కోఆర్డినేటర్ డాక్టర్ అనిల్ కుమార్, స్టడీ సెంటర్ కోఆర్డినేటర్ డా. సుంకరి రాజారామ్ తదితరులు పాల్గొన్నారు.