బెల్లాపూర్, మానూర్ గ్రామాల్లో ఘనంగా పంచాయతీ పాలకవర్గ ప్రమాణ స్వీకారం

స్థానిక ప్రతినిధి

నారాయణఖేడ్ నియోజకవర్గం మానూర్ మండలంలోని బెల్లాపూర్, మానూర్ గ్రామ పంచాయతీల నూతన పాలకవర్గాల ప్రమాణ స్వీకార కార్యక్రమాలు ఘనంగా నిర్వహించారు. ఈ కార్యక్రమంలో నారాయణఖేడ్ నియోజకవర్గ ఎమ్మెల్యే డాక్టర్ పి. సంజీవరెడ్డి పాల్గొని నూతన పాలకవర్గాన్ని అభినందించారు.

బెల్లాపూర్ గ్రామ సర్పంచ్‌గా కాజిరేశ దిగంబర్ రెడ్డి, మానూర్ గ్రామ సర్పంచ్‌గా గంపలి రమ్య సిద్ధ రెడ్డి ప్రమాణ స్వీకారం చేశారు. ఈ సందర్భంగా ఎమ్మెల్యే మాట్లాడుతూ, గ్రామ ప్రజలు భారీ మెజార్టీతో ఇచ్చిన విశ్వాసానికి కృతజ్ఞతలు తెలిపారు. ఎన్నికలు ముగిసిన అనంతరం పార్టీలకు అతీతంగా అందరినీ కలుపుకొని గ్రామాభివృద్ధే లక్ష్యంగా పనిచేయాలని సూచించారు.

గ్రామాల్లో మౌలిక వసతుల అభివృద్ధి, సంక్షేమ పథకాలు అర్హులకు అందేలా పాలకవర్గం బాధ్యతతో వ్యవహరించాలని తెలిపారు. ప్రజాప్రతినిధులు గ్రామస్తుల విశ్వాసాన్ని నిలబెట్టుకునేలా సమన్వయంతో ముందుకు సాగాలని పిలుపునిచ్చారు.

ఈ కార్యక్రమంలో గ్రామ పెద్దలు, కాంగ్రెస్ పార్టీ కార్యకర్తలు, నూతన వార్డు సభ్యులు తదితరులు పాల్గొన్నారు.