మాజీ మంత్రి, సిద్ధిపేట ఎమ్మెల్యే తన్నీరు హరీశ్‌రావుపై ప్రభుత్వ విప్ బీర్ల అయిలయ్య చేసిన వ్యాఖ్యలకు నిరసనగా బీఆర్ఎస్ మండల పార్టీ ఆధ్వర్యంలో సోమవారం పట్టణంలో ఆందోళన చేపట్టారు.

ప్రధాన రోడ్డుపై ర్యాలీ నిర్వహించిన పార్టీ నేతలు ‘ఖబర్ధార్ అయిలయ్య’, ‘డౌన్ డౌన్’ అంటూ నినాదాలు చేశారు. అనంతరం ప్రధాన కూడలిలో అయిలయ్య దిష్టిబొమ్మను దహనం చేశారు.

ఈ సందర్భంగా నాయకులు మాట్లాడుతూ, పలుమార్లు ఎమ్మెల్యేగా, ఇరిగేషన్, ఆర్థిక, వైద్యారోగ్య శాఖల మంత్రిగా రాష్ట్రానికి సేవలందించిన హరీశ్‌రావుపై అనుచిత వ్యాఖ్యలు చేయడం తగదన్నారు. హోదా మరిచి మాట్లాడితే సహించబోమని హెచ్చరించారు. అధికారంలో ఉన్నామనే అహంకారంతో మాట్లాడితే తగిన గుణపాఠం చెబుతామని స్పష్టం చేశారు.

రాష్ట్రంలో వరిధాన్యం కొనుగోళ్లు మందగించాయని, ఇంకా 30 శాతం వరకు కొనుగోళ్లు పూర్తి కాలేదని ఆరోపించారు. రైతుల సమస్యలను పట్టించుకోని కాంగ్రెస్ ప్రభుత్వానికి రైతులే తగిన సమాధానం చెబుతారని పేర్కొన్నారు. బీర్ల అయిలయ్య వెంటనే హరీశ్‌రావుకు క్షమాపణలు చెప్పాలని డిమాండ్ చేశారు.

ఈ కార్యక్రమంలో బీఆర్ఎస్ మాజీ మండల అధ్యక్షుడు కర్రె వెంకటయ్య, పట్టణ మాజీ జనరల్ సెక్రటరీ పాపట్ల నరహరి, యువజన నాయకులు ముక్యర్ల సతీష్ యాదవ్, బాలయ్య, సర్పంచ్ గడ్డం దేవేందర్ తదితరులు పాల్గొన్నారు.