జంగారెడ్డిగూడెం: మృత్యువుతో పోరాడి చివరికి ఓడిపోయినా… ఐదుగురికి కొత్త జీవితం, నలుగురికి చూపు ఇచ్చి అమరురాలైన ఒక మహిళ కథ హృదయాలను కదిలిస్తోంది. శోకసంద్రంలో మునిగిపోయిన కుటుంబం తీసుకున్న నిర్ణయం ఇప్పుడు అందరికీ ఆదర్శంగా నిలిచింది.

పట్టణానికి చెందిన నాయుడు మధుశ్రీ ఈ నెల 8న ఆత్మహత్యాయత్నానికి పాల్పడింది. పరిస్థితిని గమనించిన భర్త వెంటనే స్థానిక ప్రైవేట్ ఆసుపత్రికి తరలించగా, అక్కడి నుంచి మెరుగైన చికిత్స కోసం విజయవాడకు తరలించారు. అయితే ఉరి బిగుసుకుపోవడంతో ఆమె బ్రెయిన్ డెడ్ అయినట్లు వైద్యులు నిర్ధారించారు.

ఇక ఆ విషాదంలోనూ మానవత్వం వెలిగింది. తల్లిదండ్రులు డొంకిన సత్యనారాయణ–రాధా దంపతులు, భర్త దుర్గారావు, బంధువులు కలిసి గొప్ప నిర్ణయం తీసుకున్నారు — మధుశ్రీ అవయవాలను దానం చేయాలని. గుంటూరు కిమ్స్ శిఖర ఆసుపత్రి వైద్య బృందంతో కలిసి పరీక్షలు నిర్వహించగా, 16వ తేదీన అధికారికంగా బ్రెయిన్ డెడ్‌గా ప్రకటించారు.

అనంతరం ఆమె అవయవాలను అవసరమైన రోగులకు అమర్చారు. ఊపిరితిత్తులు చెన్నైలోని ఆసుపత్రికి, లివర్ మరియు మూత్రపిండాలు గన్నవరం, గుంటూరులోని ఆసుపత్రుల్లో ప్రాణాపాయ స్థితిలో ఉన్నవారికి అమర్చి కొత్త జీవితం అందించారు. అలాగే నేత్రదానం ద్వారా నలుగురికి చూపు ప్రసాదించారు.

ఈ సందర్భంగా కిమ్స్ ఆసుపత్రి వైద్యులు, సిబ్బంది మధుశ్రీ మృతదేహానికి గౌరవ వందనం సమర్పించారు. తహసీల్దార్, పోలీసు అధికారులు కూడా నివాళులు అర్పించారు.

“తాము తీవ్ర దుఃఖంలో ఉన్నప్పటికీ మరొకరికి ప్రాణదానం చేయాలని ముందుకు వచ్చిన ఈ కుటుంబం నిజంగా గొప్పది” అని పలువురు అభినందించారు.

మధుశ్రీ భర్త దుర్గారావు, కుమారుడు బన్విత్ (5), కుమార్తె త్రిషిక (2.9)తో పాటు కుటుంబ సభ్యులు తీవ్ర విషాదంలో మునిగిపోయారు.

మరణానంతరం కూడా ఐదుగురిలో జీవిస్తూ… నలుగురి కళ్లలో వెలుగై నిలిచిన మధుశ్రీకి సమాజం కృతజ్ఞతలు తెలుపుతోంది.