వాహనదారులకు ఇబ్బందులు – విద్యార్థుల రవాణాకు ఆటంకం

మోతే మండలంలోని రాఘవపురం ఎక్స్ రోడ్ నుండి సిరికొండకు వెళ్లే ప్రధాన రహదారి ఆక్రమణలతో ఇరుకుగా మారి ప్రజలకు తీవ్ర ఇబ్బందులు కలిగిస్తోంది. ఎప్పుడూ రద్దీగా ఉండే ఈ మార్గంలో రహదారి పక్కనే ద్విచక్ర వాహనాలు నిలిపివేయడం, చిన్న గుడిసెలు ఏర్పడడంతో దారి వెడల్పు గణనీయంగా తగ్గిపోయింది. సాధారణంగా సుమారు యాభై మీటర్ల వెడల్పు ఉండాల్సిన రహదారి ప్రస్తుతం పది మీటర్లకు కూడా తగ్గిపోవడంతో వాహనదారులు ఇబ్బందులు పడుతున్నారు. రెండు వాహనాలు ఎదురెదురుగా రావడానికే కష్టంగా మారింది.

ఈ మార్గంలో పాఠశాల బస్సులు వెళ్లే సమయంలో పరిస్థితి మరింత క్లిష్టంగా మారుతోంది. రోడ్డుపై ద్విచక్ర వాహనాలు అడ్డంగా నిలిపివేయడంతో బస్సు డ్రైవర్లు హారన్ కొట్టినా స్పందించకపోవడం, కొన్ని సందర్భాల్లో వాగ్వాదాలు, దాడుల వరకు వెళ్లడం ఆందోళన కలిగిస్తోంది. ఈ సమస్యపై పలుమార్లు సంబంధిత అధికారులకు ఫిర్యాదు చేసినప్పటికీ ఇప్పటివరకు ఎటువంటి చర్యలు తీసుకోలేదని స్థానికులు ఆవేదన వ్యక్తం చేస్తున్నారు. ప్రజల ఇబ్బందులను దృష్టిలో ఉంచుకుని రహదారి ఆక్రమణలను తక్షణమే తొలగించి, రవాణా సౌకర్యాన్ని మెరుగుపరచాలని గ్రామ ప్రజలు, వాహనదారులు గ్రామ కార్యదర్శి సహా సంబంధిత అధికారులను కోరుతున్నారు.