నల్లగొండ కలెక్టరేట్ వద్ద బీఆర్ఎస్ భారీ ధర్నా..

వడ్ల కొనుగోళ్లలో అన్యాయాలపై మాజీ ఎమ్మెల్యే చిరుమర్తి గర్జన..

జాయింట్ కలెక్టర్‌కు వినతి పత్రం అందజేత 15 రోజుల్లో కొంటామని హామీ..

​నల్లగొండ, : జిల్లాలో ధాన్యం కొనుగోళ్ల తీరు అస్తవ్యస్తంగా మారింది. నెల రోజులుగా మండే ఎండల్లో వడ్ల కుప్పల వద్ద రైతన్నలు పడిగాపులు కాస్తున్నా పాలకుల్లో చలనం లేకపోవడంపై బీఆర్ఎస్ శ్రేణులు ఆగ్రహం వ్యక్తం చేశాయి. సోమవారం నల్లగొండ కలెక్టరేట్ వద్ద నకిరేకల్ మాజీ ఎమ్మెల్యే చిరుమర్తి లింగయ్య, జిల్లా పరిషత్ మాజీ చైర్మన్ బండా నరేందర్ రెడ్డి నేతృత్వంలో భారీ ధర్నా నిర్వహించారు. కాంగ్రెస్ ప్రభుత్వం అవలంబిస్తున్న రైతు వ్యతిరేక విధానాలపై నిరసన గళం విప్పారు. అనంతరం జాయింట్ కలెక్టర్‌ను కలిసి సమస్యలపై వినతి పత్రం అందజేశారు.

అడుగడుగునా దోపిడీయే...

ఈ సందర్భంగా మాజీ ఎమ్మెల్యే చిరుమర్తి లింగయ్య మీడియాతో మాట్లాడుతూ ప్రభుత్వంపై తీవ్ర స్థాయిలో మండిపడ్డారు. జిల్లాలోని వివిధ కొనుగోలు కేంద్రాలను స్వయంగా పరిశీలిస్తే గుండె తరుక్కుపోతోందని ఆవేదన వ్యక్తం చేశారు. కొనుగోలు కేంద్రాల్లో ధాన్యం కాంటా అయినా, వాటిని మిల్లులకు తరలించడానికి సరిపడా లారీలు లేవని దీంతో వడ్లు రోజుల తరబడి కేంద్రాల్లోనే పేరుకుపోతున్నాయి. తేమ శాతం సాకుతో క్వింటాకు అడ్డగోలుగా కిలోల కొద్దీ తరుగు తీస్తూ రైతుల నోరు కొడుతున్నారన్నారు. అధికారుల పర్యవేక్షణ లేకపోవడంతో మధ్యవర్తులు, దళారులు రైతులను భయపెట్టి తక్కువ ధరకే ధాన్యం కొనుగోలు చేస్తూ కోట్లు గడిస్తున్నారు. మార్కెట్ యార్డుల్లో కాంగ్రెస్ నాయకులు, వారి అనుచరులు పెత్తనం చెలాయిస్తూ సామాన్య రైతును ఇబ్బందులకు గురిచేస్తున్నారని విమర్శించారు. ఎండలో ఎండుతూ, అకాల వర్షాలకు తడుస్తున్నా.. కనీసం తార్పాలిన్లు, తాగునీరు, నీడ వంటి సౌకర్యాలు కూడా కల్పించడంలో ప్రభుత్వం విఫలమైందన్నారు.

అప్పుల ఊబిలో అన్నదాత...

​ధాన్యం కొనుగోలు చేసినా చెల్లింపులు సకాలంలో రాకపోవడంతో రైతులు అప్పుల పాలవుతున్నారని అకాల వర్షాలతో ధాన్యం తడిసి ముద్దవుతున్నా పట్టించుకునే నాథుడే లేడని చిరుమర్తి ధ్వజమెత్తారు. దేశానికి అన్నం పెట్టే రైతన్న కంటతడి పెడితే ఈ ప్రభుత్వానికి పుట్టగతులు ఉండవు అని హెచ్చరించారు. రాజకీయ జోక్యాన్ని అరికట్టి పారదర్శకంగా కాంటాలు నిర్వహించాలని డిమాండ్ చేశారు. రైతుల సమస్యలను విన్న జాయింట్ కలెక్టర్ స్పందిస్తూ.. రాబోయే 15 రోజుల్లోపు జిల్లా వ్యాప్తంగా ధాన్యం కొనుగోలు ప్రక్రియను పూర్తి స్థాయిలో ముగిస్తామని హామీ ఇచ్చారు. లారీల సంఖ్యను పెంచి ధాన్యం తరలింపును వేగవంతం చేస్తామని తెలిపారు. ఈ కార్యక్రమంలో పెద్ద ఎత్తున బీఆర్ఎస్ నాయకులు, కార్యకర్తలు మరియు రైతులు పాల్గొన్నారు.