హైదరాబాద్‌లోని డా. బి.ఆర్. అంబేద్కర్ సార్వత్రిక విశ్వవిద్యాలయ అభివృద్ధికి రాష్ట్ర ప్రభుత్వం భారీ నిధులు కేటాయించడంతో ఉద్యోగ సంఘాలు ముఖ్యమంత్రి ఎ. రేవంత్ రెడ్డి, ఉప ముఖ్యమంత్రి భట్టి విక్రమార్కకు కృతజ్ఞతలు తెలిపారు.

తాజా రాష్ట్ర బడ్జెట్‌లో విశ్వవిద్యాలయ మౌలిక సదుపాయాల అభివృద్ధికి రూ.50 కోట్లు, ఉద్యోగుల వేతనాల కోసం రూ.24.30 కోట్లు కేటాయించడంతో పాటు, ఇప్పటికే అంబేద్కర్ అంతర్జాతీయ పరిశోధనా కేంద్రం కోసం రూ.100 కోట్లు మంజూరు చేసిన విషయాన్ని సంఘాల ప్రతినిధులు గుర్తుచేశారు.

ఈ సందర్భంగా బోధనేతర, టెక్నికల్ ఉద్యోగ సంఘాల నాయకులు మాట్లాడుతూ, రాష్ట్రంలోని విశ్వవిద్యాలయాల్లో అంబేద్కర్ ఓపెన్ యూనివర్సిటీకి అత్యధిక అభివృద్ధి గ్రాంటు లభించడం గర్వకారణమన్నారు. ఇది విశ్వవిద్యాలయంపై ప్రభుత్వ విశ్వాసానికి నిదర్శనమని పేర్కొన్నారు.

ఈ నిధులతో విశ్వవిద్యాలయంలో మౌలిక వసతుల అభివృద్ధి వేగవంతం అవుతుందని ఆశాభావం వ్యక్తం చేశారు.