ఇన్‌ఫ్లిబ్‌నెట్‌తో ఒప్పందం – 13 వేల జర్నల్స్ ఉచితం

హైదరాబాద్,

డా. బి.ఆర్. అంబేద్కర్ ఓపెన్ యూనివర్సిటీ పరిశోధనలను బలోపేతం చేయడంతో పాటు డిజిటల్ విద్యా వసతుల అభివృద్ధి దిశగా ముందడుగు వేసింది. ఈ మేరకు యూనివర్సిటీ, ఇన్‌ఫ్లిబ్‌నెట్ సెంటర్‌తో అవగాహన ఒప్పందం కుదుర్చుకుంది.

మంగళవారం యూనివర్సిటీలో నిర్వహించిన కార్యక్రమంలో వైస్ ఛాన్సలర్ ప్రొ. ఘంటా చక్రపాణి, ఇన్‌ఫ్లిబ్‌నెట్ డైరెక్టర్ ప్రొ. దేవికా మడళ్లి పాల్గొన్నారు. ఈ సందర్భంగా ‘వన్ నేషన్ వన్ సబ్‌స్క్రిప్షన్ (ONOS)’ కార్యక్రమాన్ని ప్రారంభించారు. దీని ద్వారా 13 వేల పరిశోధనా జర్నల్స్ పరిశోధకులు, అధ్యాపకులకు ఉచితంగా అందుబాటులోకి రానున్నట్లు వీసీ తెలిపారు.

ఇన్‌ఫ్లిబ్‌నెట్ ‘కార్నెట్’ను ఆవిష్కరించారు. చెట్టు ఆకారంలో రూపొందించిన ఈ నమూనాలో క్యూఆర్ కోడ్‌ల ద్వారా ‘షోధ్‌చక్ర’ పరిశోధన నిర్వహణ వ్యవస్థకు సులభంగా ప్రాప్యత లభిస్తుంది. ప్రవేశం నుంచి థీసిస్ సమర్పణ వరకు ప్రతి దశలో మార్గదర్శకాలు అందుబాటులో ఉంటాయని తెలిపారు.

పరిశోధన నాణ్యతను పెంచేందుకు ప్లగరిజం తనిఖీ సాఫ్ట్‌వేర్‌ను అమల్లోకి తేనున్నారు. తద్వారా ప్రతి థీసిస్‌ను సమగ్రంగా పరిశీలించి ‘షోధ్‌గంగ’లో అప్‌లోడ్ చేయనున్నారు. దీని ద్వారా పరిశోధన ప్రమాణాలు మెరుగుపడతాయని పేర్కొన్నారు.

అదేవిధంగా యూనివర్సిటీ, ఇన్‌ఫ్లిబ్‌నెట్ భాగస్వామ్యంతో 1.5 లక్షల మంది విద్యార్థులకు లెర్నింగ్ మేనేజ్‌మెంట్ సిస్టమ్ (LMS) అందుబాటులోకి రానుంది. వీడియో, ఆడియో, పాఠ్య రూపంలో ఉన్న విద్యా వనరులతో పాటు మైక్రో-క్రెడెన్షియల్స్ కోర్సులు కూడా అభ్యసించే అవకాశం కల్పించనున్నారు.

ఈ ఒప్పందం ద్వారా పరిశోధన మద్దతు వ్యవస్థలు, డిజిటల్ వనరులు, అకాడమిక్ సహకారం మరింత బలోపేతం కానున్నాయి. ఇన్‌ఫ్లిబ్‌నెట్ నిర్వహించే శిక్షణా కార్యక్రమాలకు యూనివర్సిటీ వేదిక కానుందని వీసీ తెలిపారు. ఈ కార్యక్రమాలు ‘ప్రధాన్ మంత్రి ఉచ్చతర్ శిక్షా అభియాన్ (PM-USHA)’ పథకం కింద అమలు కానున్నాయి.

ఈ కార్యక్రమంలో అకాడమిక్ డైరెక్టర్ ప్రొ. జి. పుష్పా చక్రపాణి, ప్రొ. ఎన్. రజని, ప్రొ. రబింద్రనాథ్ సోలమన్, ప్రొ. పి. వెంకట రమణ, ప్రొ. బి. శ్రీనివాస్, ప్రొ. కె. శ్రీదేవి, డా. వై. వెంకటేశ్వర్లు, వసంతరావు తదితరులు పాల్గొన్నారు.