ప్రజల ప్రాణాలకు ముప్పు… సాహసంగా వెంబడించి నిందితుల పట్టివేత

అప్రమత్తమైన పోలీసులు – ప్రమాదకర డ్రైవింగ్‌కు చెక్

ఎన్టీఆర్ జిల్లా, తిరువూరు నియోజకవర్గ పరిధిలో అతివేగంగా కారు నడిపి ప్రజల ప్రాణాలకు ముప్పు కలిగించిన ఇద్దరు గుర్తుతెలియని వ్యక్తులను పోలీసులు అదుపులోకి తీసుకున్నారు.

విస్సన్నపేట మండల పరిధిలో రహదారిపై ఓ కారు ప్రమాదకరంగా దూసుకెళ్తూ ప్రజలను భయభ్రాంతులకు గురిచేస్తోందని సమాచారం అందడంతో, విస్సన్నపేట పోలీస్ స్టేషన్ సిబ్బంది వెంటనే అప్రమత్తమయ్యారు.

ఈ క్రమంలో కానిస్టేబుళ్లు షేక్ రియాజ్, నాగేశ్వరావు సాహసోపేతంగా వాహనాన్ని వెంబడించారు. ప్రమాదాన్ని లెక్కచేయకుండా చాకచక్యంగా కారును నిలిపివేసి, అందులో ప్రయాణిస్తున్న ఇద్దరిని అదుపులోకి తీసుకున్నారు.

తదుపరి వారిని పోలీస్ స్టేషన్‌కు తరలించి విచారణ ప్రారంభించినట్లు అధికారులు తెలిపారు. ఈ ఘటనను చూసిన స్థానికులు, రహదారి వెంట ప్రయాణిస్తున్న వాహనదారులు పోలీసుల తక్షణ స్పందనను అభినందించారు.

ప్రజల భద్రతే ప్రధాన లక్ష్యంగా పోలీసులు ఎప్పటికప్పుడు అప్రమత్తంగా పనిచేస్తున్నారని అధికారులు పేర్కొన్నారు.