విద్యలో నారాయణఖేడ్‌కు రాష్ట్రస్థాయి గుర్తింపు

స్థానిక ప్రతినిధి

ప్రభుత్వ పాఠశాల ప్రగతికి ప్రతీకగా నిలిచిన మన్మధ కిషోర్‌కు ఎడ్యుకేషన్ ఎక్సలెన్స్ అవార్డు

ప్రభుత్వ పాఠశాలలపై ఉన్న అపోహలను చెరిపేస్తూ, విద్యలో నాణ్యత అంటే ఏమిటో నిరూపిస్తూ జిల్లా పరిషత్ ఉన్నత పాఠశాల నారాయణఖేడ్ రాష్ట్రస్థాయిలో గుర్తింపు పొందింది. విద్యా ప్రగతి, విద్యార్థుల సమగ్ర అభివృద్ధి, వినూత్న బోధనా విధానాలతో పాఠశాలను ప్రగతి పథంలో నడిపిస్తున్నందుకు ఉమ్మడి మెదక్ జిల్లా ఉత్తమ పాఠశాలగా ఎంపికైంది. ఈ క్రమంలో పాఠశాల ప్రధానోపాధ్యాయుడు మన్మధ కిషోర్‌కు ప్రతిష్ఠాత్మక ఎడ్యుకేషన్ ఎక్సలెన్స్ అవార్డు వరించింది.

హైదరాబాద్‌లోని నోవాటల్ కన్వెన్షన్‌లో నిర్వహించిన అవార్డు ప్రదానోత్సవంలో సీబీఐ మాజీ డైరెక్టర్ వీవీ లక్ష్మీనారాయణ ఈ అవార్డును ప్రదానం చేశారు. ఈ సందర్భంగా ఆయన మాట్లాడుతూ—విద్యార్థుల భవిష్యత్తుకు బాటలు వేయడం ఉపాధ్యాయులపై ఉన్న అత్యంత కీలకమైన సామాజిక బాధ్యత అని పేర్కొన్నారు. ఆ బాధ్యతను నిబద్ధతతో నిర్వర్తిస్తున్న ఉపాధ్యాయులను సమాజం గౌరవించాల్సిన అవసరం ఉందన్నారు. ఉపాధ్యాయుల స్ఫూర్తితోనే విద్యార్థులు ఉన్నత శిఖరాలకు చేరుకుంటారని స్పష్టం చేశారు.

కార్యక్రమ నిర్వాహకులు సంధ్యా రాజగోపాల్ మాట్లాడుతూ—మారుతున్న కాలానికి అనుగుణంగా విద్యా వ్యవస్థలో నూతన సాంకేతికతను సమన్వయం చేయాల్సిన అవసరం ఉందన్నారు. ప్రతి పాఠశాల విద్యార్థులకు ఆధునిక బోధన అందించే దిశగా ముందుకు సాగాలని సూచించారు.

నారాయణఖేడ్ జిల్లా పరిషత్ ఉన్నత పాఠశాలను ప్రత్యేకంగా ఎంపిక చేయడానికి 900 మందికి పైగా విద్యార్థులతో కూడిన బలమైన విద్యా వాతావరణం, వివిధ స్వచ్ఛంద సంస్థల సహకారంతో పాఠశాల అభివృద్ధికి చేపడుతున్న నిరంతర కార్యక్రమాలు, విద్యా–సహ విద్యా కార్యకలాపాల్లో పాఠశాల సాధిస్తున్న విజయాలే ప్రధాన కారణాలని నిర్వాహకులు తెలిపారు.

ఈ కార్యక్రమంలో ఉపాధ్యాయులు రాజశేఖర్, చంద్రశేఖర ఆచార్యతో పాటు పలువురు విద్యావేత్తలు పాల్గొన్నారు.