తిరుమలగిరి మున్సిపాలిటీలో 15లో 10 వార్డులు భారత రాష్ట్ర సమితి ఖాతాలో – 5 స్థానాలతో కాంగ్రెస్ ప్రతిపక్షం

తిరుమలగిరి: ఉత్కంఠ భరితంగా సాగిన ఓట్ల లెక్కింపులో గులాబీ జెండా రెపరెపలాడింది. మొత్తం 15 వార్డులకు జరిగిన మున్సిపల్ ఎన్నికల్లో 10 వార్డులను కైవసం చేసుకున్న భారత రాష్ట్ర సమితి మున్సిపల్ చైర్మన్ పీఠాన్ని దక్కించుకునే స్థితికి చేరుకుంది. ఐదు వార్డులు గెలుచుకున్న భారత జాతీయ కాంగ్రెస్ పార్టీ ఆధిక్య సంఖ్యను అందుకోలేక ప్రతిపక్షంగా నిలిచింది.ఎన్నికల ప్రకటన వెలువడిన నాటి నుంచే భారత రాష్ట్ర సమితి వ్యూహాత్మకంగా ముందడుగు వేసింది. చైర్మన్ అభ్యర్థిని ముందుగానే ప్రకటించి వార్డు స్థాయిలో సమన్వయం చేస్తూ ప్రచారాన్ని నడిపింది. గ్రామీణ శైలిలో ఇంటింటికీ చేరి ఓటర్లను ఆకట్టుకోవడంలో పార్టీ శ్రేణులు సమర్థంగా కృషి చేశాయి. “చైర్మన్ పీఠం మాదే” అన్న నినాదంతో ప్రారంభమైన ప్రచారం ఫలితాల్లో ప్రతిఫలించింది. పది స్థానాలు గెలుచుకోవడంతో మున్సిపాలిటీపై తన ఆధిపత్యాన్ని చాటుకుంది.ఇక కాంగ్రెస్ పార్టీ విషయంలో వ్యూహాత్మక లోపాలు ప్రతికూలంగా మారినట్లు రాజకీయ విశ్లేషకులు అభిప్రాయపడుతున్నారు. అభ్యర్థుల ఎంపికలో ఆలస్యం, బీఫారం జారీ విషయంలో తడబాటు, ముఖ్యంగా చైర్మన్ అభ్యర్థిని ముందుగానే ప్రకటించకపోవడం పార్టీకి నష్టమైందని చెబుతున్నారు. అంతర్గత సమన్వయ లోపం కూడా ఫలితాలపై ప్రభావం చూపిందని విశ్లేషిస్తున్నారు. తిరుమలగిరి రాజకీయాల్లో భారత రాష్ట్ర సమితి విజయంతో పార్టీ శ్రేణుల్లో ఉత్సాహం నెలకొనగా, కాంగ్రెస్ పార్టీ ఆత్మపరిశీలన అవసరమని స్థానిక వర్గాలు భావిస్తున్నాయి.

వార్డుల వారీగా విజేతలు

1వ వార్డు – పనికెరా లక్ష్మి (భారత రాష్ట్ర సమితి) 76 ఓట్ల మెజార్టీతో విజయం

2వ వార్డు – జక్కుల రమేష్ (భారత రాష్ట్ర సమితి) 74 ఓట్ల మెజార్టీతో విజయం

3వ వార్డు – కారుపోతుల సోమలక్ష్మి నరేష్ (భారత రాష్ట్ర సమితి) 88 ఓట్ల మెజార్టీతో విజయం

4వ వార్డు – బత్తుల శకుంతల (భారత రాష్ట్ర సమితి) 98 ఓట్ల మెజార్టీతో విజయం

5వ వార్డు – తిరుమణి యాదగిరి (భారత జాతీయ కాంగ్రెస్) 83 ఓట్ల మెజార్టీతో విజయం

6వ వార్డు – కేసిడి కవిత వెంకటరెడ్డి (భారత జాతీయ కాంగ్రెస్) 89 ఓట్ల మెజార్టీతో విజయం

7వ వార్డు – బత్తుల శ్రీను (భారత జాతీయ కాంగ్రెస్) 78 ఓట్ల మెజార్టీతో విజయం

8వ వార్డు – చిలుక వెన్నెల అంజి (భారత జాతీయ కాంగ్రెస్) 73 ఓట్ల మెజార్టీతో విజయం

9వ వార్డు – కన్నెబోయిన మల్లయ్య (భారత జాతీయ కాంగ్రెస్) 123 ఓట్ల మెజార్టీతో విజయం

10వ వార్డు – భూక్య యాకూబ్ నాయక్ (భారత రాష్ట్ర సమితి) 2 ఓట్ల మెజార్టీతో విజయం

11వ వార్డు – ఏమోజు గోవిందమ్మ రవీందర్ (భారత రాష్ట్ర సమితి) 321 ఓట్ల మెజార్టీతో విజయం

12వ వార్డు – కందుకూరి గీత బాబు (భారత రాష్ట్ర సమితి) 150 ఓట్ల మెజార్టీతో విజయం

13వ వార్డు – సంకేపల్లి జ్యోతి నరోత్తం రెడ్డి (భారత రాష్ట్ర సమితి) 67 ఓట్ల మెజార్టీతో విజయం

14వ వార్డు – సంకేపల్లి రఘునందన్ రెడ్డి (భారత రాష్ట్ర సమితి) 128 ఓట్ల మెజార్టీతో విజయం

15వ వార్డు – పత్తేపురం త్రిశూల్ (భారత రాష్ట్ర సమితి) 195 ఓట్ల మెజార్టీతో విజయం

మొత్తం ఫలితాల్లో పది స్థానాలు సాధించి భారత రాష్ట్ర సమితి తిరుమలగిరి మున్సిపాలిటీలో స్పష్టమైన ఆధిక్యాన్ని చాటుకోగా, ఐదు స్థానాలతో కాంగ్రెస్ పార్టీ ప్రతిపక్షంగా నిలిచింది.